"Azərbaycanla Türkmənistanın seçki qurumları arasında əməkdaşlıq yoxdur. Ona görə də Türkmənistanda keçiriləcək prezident seçkilərini Azərbaycanın Mərkəzi Seçki Komissiyası nümayəndələrinin də müşahidə edib-etməyəcəyi hələlik məlum deyil". Bu fikirləri Trend ə Azərbaycanın Mərkəzi Seçki Komissiyasının (MSK) beynəlxalq əlaqələr şöbəsinin müdiri Rövzət Qasımov bildirib.
Qeyd edək ki, Türkmənbaşı Saparmurad Niyazov vəfat etdiyi üçün gələn il fevralın 11-də Türkmənistanda prezident seçkiləri təyin olunub. Bu seçkiləri Azərbaycanın nümayəndə heyətinin müşahidə edib-etməyəcəyi ilə bağlı Rövzət Qasımov deyib ki, ölkələrimiz arasında seçki sahəsinə dair hər hansı əməkdaşlıq və qarşılıqlı müqavilələr mövcud deyil. Buna baxmayaraq, əgər Türkmənistandan dəvət gələrsə, MSK öz müşahidəçisini göndərə bilər. Hələlik Azərbaycana heç bir rəsmi müraciət edilməyib.