Milli Məclis gənclik yaşını 35-dən 29-a endirib
Azərbaycan, Bakı / Trend , müxbir İ.Əlizadə/ Milli Məclisin çərşənbə axşamı keçirilən iclasında "Gənclər siyasəti haqqında" qanuna əlavə və dəyişiklik edilib və gənclik yaşı 35-dən 29-a endirilib.
Milli Məclisin Sosial siyasət daimi komissiyasının sədri Hadi Rəcəbli qanunun mahiyyəti barədə ətraflı məlumat verib. Komissiya sədri qeyd edib ki, sənəd gənclər siyasətinin məqsədlərini, prinsiplərini, istiqamətlərini, təşkilati-hüquqi əsaslarını müəyyən edəcək və bu sahədə yaranan münasibətləri tənzimləyəcək. Azərbaycan gənclərinin həm iqtisadi, həm sosial, həm siyasi proseslərin daim önündə olduqlarını qeyd edən komissiya sədri bu qanunun gənclərin bir çox problemlərinin həllində onlara yardımçı ola biləcəyini vurğulayıb.
Yeni layihədə BMT standartlarına uyğun olaraq gənclik yaşı 35-dən 29-a endirilib. Komissiya sədri qeyd edib ki, belə bir dəyişiklik beynəlxalq standartlara uyğundur. Çünki dünyada qəbul olunan gənclik yaşı 29-dur.
Bundan əlavə sənəddə orduya çağırılan gənclərin tərxis olunandan sonra öz iş yerlərində əmək fəaliyyətlərini davam etdirə bilmələri də nəzərdə tutulub. Bildirildi ki, gənclərə ailə planlaması və reproduktiv sağlamlıq sahəsində biliklərin verilməsi, istedadlı və yaradıcı gənclərin aşkar edilməsi və inkişafına yönəldilmiş tədbirlərin həyata keçirilməsi də qanunda öz əksini tapıb.
Bundan başqa gənc ailələrin ipoteka krediti almalarına şərait yaratmaq üçün gənc ailə yaşı 35-də saxlanılıb. 35 yaşaına qədər olan şəxslər ailə həyata quranda onların ailəsi gənc ailə hesab olunacaq.
Rəcəbli əlavə edib ki, "Gənclər siyasəti haqqında" qanuna təklif olunan əlavə və dəyişikliklər müvafiq strukturların təmsilçilərinin iştirakı ilə geniş müzakirə olunub. Müzakirələrdən sonra "Gənclər siyasəti haqqında" qanuna təklif olunan əlavə və dəyişikliklər qəbul olunub.
