Fransa, Strasburq, 20 fevral/ Trend , müxbir, A.Məhərrəmli, İ.Əlizadə/ Avropa Şurasının insan hüquqları üzrə komissarı Azərbaycan hökumətini insan alverinə qarşı mübarizəni və məişət zorakılığına qarşı tədbirləri gücləndirməyə çağırır. Bu barədə Avropa Şurasının İnsan Hüquqları üzrə komissarı Tomas Hammarberq (Thomas Hammarberg) Azərbaycanda insan haqlarının vəziyyətinə dair hazırladığı məruzədə bildirib. Komissarın Bürosundan çərşənbə axşamı Trend ə verilən məlumata görə, məruzə fevralın 20 - də Avropa Şurası Nazirlər Komitəsinə təqdim edilib. Çıxışında Azərbaycanda insan haqları sahəsində əldə edilən irəliləyişləri qeyd edən komissar 2006-cı ildə qəbul edilmiş "İnsan haqlarının qorunmasına dair milli fəaliyyət planı"nın ciddi şəkildə həyata keçiriləcəyini xüsusi vurğulayıb. O, mövcud olan bəzi problemlərə də toxunub. Hakimlərin daha da müstəqil olmasının vacibliyini qeyd edən Hammamberq böhtan və təhqirə görə Qanunun dəyişdirilməsini, yəni onun dekriminalizasiyanın yaxşı nəticə verə biləcəyini bildirib.
Komissar polis orqanlarında istintaq müddətində işgəncə hallarının olmasından, həbsxanaların vəziyyətindən, xüsusilə, ömürlük həbs cəzasına məhkum edilmiş məhbusların saxlanılma şəraitindən bəhs edib.
Məruzədə Dağlıq Qarabağ münaqişəsinə toxunan komissar qaçqınlar və məcburi köçkünlərə diqqətin artırılmasını və onların ölkə daxilində sərbəst hərəkətinin və həyat şəraitlərinin daha da yaxşılaşdırılmasının vacibliyini vurğulayıb.
Məruzəyə münasibət bildirən Azərbaycanın Avropa Şurasındakı daimi nümayəndəsi Arif Məmmədov bu sahədə görülən işlər barədə ətraflı məlumat verib və Azərbaycan hakimiyyətinin bundan sonra da Avropa Şurası ilə sıx əməkdaşlıq etməyə hazır olduğunu bildirib.
Xatırladaq ki, Tomas Hammarberq Azərbaycanda insan haqları sahəsində vəziyyətlə tanış olmaq üçün 2007- ci il sentyabrın 3-7- də ölkəyə dəyərləndirmə səfəri edib.
