Azərbaycan, Bakı, 04 aprel / Trend , müxbir K.Zərbalıyeva/ Azərbaycan Demokrat Partiyasının (ADP) sədri Avropa Məhkəməsinin qərarının icra olunmamasından AŞ-nin Nazirlər Komitəsinə şikayət verəcək.
ADP sədri Sərdar Cəlaloğlu cümə günü Trend a bildirib ki, işgəncəyə məruz qalması ilə bağlı Baş Prokurorluq indiyədək cinayət işi açmayıb və o, zərərçəkən tərəf kimi tanınmayıb.
Nəsimi rayon Məhkəməsi Avropa İnsan Haqları Məhkəməsinin qəbul etdiyi qərara uyğun olaraq ADP sədrinin işgəncəyə məruz qaldığını təsdiqləyib və faktın araşdırılması, işgəncə verən şəxslərin cinayət məsuliyyətinə cəlb olunması ilə bağlı sənədlərin Respublika Prokurorluğuna göndərilməsi barədə qərar qəbul edib.
Cəlaloğlu deyib ki, BMT-nin İşgəncələrə qarşı Konvensiyasının müddəalarına görə, işgəncə faktının aşakr olunduğu vaxtdan dərhal sonra dövlət müvafiq prosesə başlamalı və cavabdeh şəxslər məsuliyyətə cəlb olunmalıdırlar.
"Baş Prokurorluğun indiyədək cinayət işi başlamamsı onu göstərir ki, hüquq-mühafizə orqanları işgəncəyə göz yumur",- deyə ADP sədri vurğulayıb.
ADP sədri Nəsimi rayon məhkəməsinin qərarının icrası üçün Baş Prokurorluğa müraciət etdiyini və yaxın günlərdə müraciətinə cavab verilmədiyi halda AŞ-nin Nazirlər Komitəsinə və İnsan Haqları üzrə Avropa Məhkəməsinə müraciət edəcəyini deyib.
Baş Prokurorluğun mətbuat xidmətindən isə bu barədə məlumat alamaq mümkün olmayıb.
Cəlaloğlu 2003-cü ilin prezident seçkilərindən sonra baş vermiş kütləvi iğtişaşların təşkilində təqsirli bilinərək həbs edilib. Həbsdə olduğu müddətdə ona işgəncə verildiyi üçün Avropa Məhkəməsinə müraciət edib.
Ötən il yanvarın 11-də Avropa Məhkəməsi Cəlaloğlunun şikayəti ilə bağlı qərar qəbul edib. Qərarda Cəlaloğlunun Avropa Konvensiyasının 3-cü maddəsində (işgəncələrin qadağan olunması) nəzərdə tutulan hüququnun pozuntusu qeyd olunub və Azərbaycan dövləti tərəfindən bu hüququn pozuntusuna görə, ona 10 min avro məbləğində təzminat ödənilməsi nəzərdə tutulub.
Avropa Məhkəməsinin qərarından sonra Ali Məhkəmə işgəncə faktına qiymət verilməsi ilə bağlı prosedura başlayıb.
Cəlaloğlu Nəsimi rayon məhkəməsinə Respublika Prokurorluğunun Ağır Cinayətlərə Dair İstintaq İdarəsinin keçmiş rəisi Tahir Kazımov, Nəsimi rayon məhkəməsinin keçmiş hakimi Gülnarə Tağızadə, əlavə olaraq işgəncənin gizlədilməsində iştirak edən Baş Mütəşəkkil Cinayətkarlıqla Mübarizə İdarəsinin (BMCMİ) 4 müvəkkili, BMCMİ təcridxanasının rəisi Fərhad Mehdiyev, idarənin əməkdaşları Əyyub Seyidov, Nadir Məmmədov, Kamil Bilalov və ümumilikdə 20 nəfərin işgəncə faktında, bu cinayətin gizlədilməsində iştirak etməsi ilə bağlı müraciət edib.
Məqalənin müəllifi ilə [email protected] ünvanı ilə əlaqə saxlaya bilərsiniz
