Azərbaycan, Naxçıvan, 05 may / Trend , müxbir E.Məmmədov/ Naxçıvan Muxtar Respublikasının tibb müəssisələrində işdən çıxarılan tibb işçiləri iş yerlərinə bərpa olunublar.
Milli Təhlükəsizlik (MTN) ilə Daxili İşlər nazirliklərinin birgə apardığı əməliyyat nəticəsində martın sonlarında Naxçıvanda fəaliyyət göstərən tibb müəssisələrində Tələbə Qəbulu üzrə Dövlət Komissiyasının qəbulundan kənar özəl tibb texnikumlarını bitirən, ümumilikdə 1000-dən çox tibb işçisinin çalışdığı müəyyənləşdirilmişdi. Onlardan 442-si işdən azad edilmişdi.
Məlumata görə, narazılıq yarandığından, həmin tibb işçiləri vəzifələrinə qaytarılıb. Ancaq onların saxta diplomları əllərindən alınıb.
Naxçıvan MR Səhiyyə Nazirliyindən isə bildiriblər ki, 3 ildən artıq iş stajı olan tibb işçiləri, saxta diplomları olmasına baxmayaraq, işlərində qalacaqlar, qalanları isə vəzifələrindən azad ediləcək.
İşlərinə bərpa olunan 442 tibb işçisinə hələlik 2009-cu ilin yanvarına kimi işləməyə möhlət verilib.
Məqalə müəllifi ilə əlaqə ünvanı: [email protected]