Azərbaycan,Bakı,27 may / Trend , müxbir K.Zərbalıyeva/ Seçki Monitorinq Mərkəzinin qeydiyyatının ləğvi barədə məhkəmə qərarının dərhal icraya yönəldilməsi məsələsindən verilən şikayət təmin olunmayıb.
Çərşənbə axşamı Bakının Xətai rayon məhkəməsində Seçki Monitorinq Mərkəzinin şikayətinə baxılıb.
Mayın 14-də Xətai rayon məhkəməsi Ədliyyə Nazirliyinin Qeydiyyat və Notariat Baş İdarəsinin müraciəti əsasında, Seçki Mon itorinq Mərkəzinin qeydiyyatının etibarsız hesab edilməsi və ləğv olunması barədə qərar qəbul edib və qərarda onun dərhal icraya yönəldilməsi qeyd olunub.
SMM ilk dəfə 2006-cı il martın 14 - də təsis sənədlərini qeydiyyata alınması üçün Ədliyyə nazirliyinə təqdim edib.
Nazirliyin müvafiq idarəsi texniki bəhanələr gətirərək, təsis sənədlərini qeydiyyata almayıb və SMM-in dövlət qeydiyyatına alınmaq üçün müraciətindən 5 dəfə imtina olunub.
Bu ilin fevralında isə, SMM dövlət qeydiyyatına alınıb.
Nazirlik Mərkəzin qeydiyyatının ləğvi barədə iddiasını təşkilatın təsis sənədlərində təsisçilər barəsindəki məlumatların qeyri-müəyyən olması, təşkilatın hüquqi ünvanının dəyişdirilməsi barədə məlumatın nazirliyə bildirilməməsi, SMM-in Azərbaycanın 8 şəhərində yerləşən nümayəndəlikləri barədə məlumatların dövlət reyestrinə daxil edilməməsi ilə əsaslandırıb.
Təşkilatın icraçı direktoru Anar Məmmədli bildirib ki, məhkəmənin qərarından sonra Mərkəzin fəaliyyətinə məhdudiyyətlər yaranıb.
Belə ki, təşkilatın internet səhifəsinə girişlə bağlı siqnallara Azərbaycan daxilində yasaq qoyulub.
SMM bununla bağlı Rabitə və informasiya Texnalogiyaları Nazirliyinə müraciət etməyi planlaşdırır.
Müəlliflə əlaqə saxlamaq üçün elektron ünvan - [email protected]
