Azərbaycan, Bakı, 28 may / Trend , müxbir M.Əliyev/ Rəsmi Vaşinqton Azərbaycan hökumətinin kütləvi informasiya vasitələrinə təzyiqi ilə bağlı yenidən narahtlığını bildirib. Bu barədə Azərbaycanda demokratiyanın vəziyyətinə dair illik məruzədə bildirilir.
ABŞ jurnalistlərin öz yazılarına görə həbsdə olmasından narahatdır. Məruzədə bildirilir ki, dövlət tərəfindən müstəqil KİV-ə təzyiq göstəriləcəyi təqdirdə, Birləşmiş Ştatlar bu hadisələr barədə açıq bəyanatlar yayacaq.
Azərbaycanda üç jurnalst - "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Mirzə Sakit və "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev həbsdədir.
Azərbaycan Prezidenti İcra Aparatının rəhbəri Ramiz Mehdiyev əvvəllər bildirib ki, Azərbaycanda söz və mətbuat azadlığı mövcuddur. "Həbs olunan jurnalistlər konkret cinayətlər törədiblər və buna görə də məsuliyyətə cəlb ediliblər", - deyə o bildirib.
ABŞ öz növbəsində Azərbaycan hakimiyyətini israrla toplaşma azadlığı hüququna hörmətlə yanaşmağa və dinc nümayişlərin keçirilməsinə icazə verməyə çağırır. Birləşmiş Ştatlar toplaşma azadlığı hüququna tam hörmətlə yanaşmanın zəruriliyini bildirərək, nümayişçilərə qarşı güc tətbiq edilməsini pisləyib və Azərbaycanın vəzifəli şəxslərini siyasi nümayişlər zamanı polisin davranışlarına nəzərat etməyə çağırıb.
Milli Məclisin Aparat rəhbəri Səfa Mirzəyev əvvəllər Trend -a bildirib ki, qanuna əsasən, aksiyaların keçirilməsi digər vətəndaşların azad hərəkətinə mane olmamalıdır. Onun sözlərinə görə, aksiyalar qanunsuz olacağı, yerli hakimiyyət orqanları ilə razılaşdırılmayacağı təqdirdə, polis onların keçirilməsinin qarşısını alacaq.
"Yerli hakimiyyət orqanları strukturlara aksiyaların keçirilməsi üçün alternativ yerlər təklif edə bilər. Dünya praktikasında bu normal haldır", - deyə Mirzəyev hesab edir.
May ayının sonunda Azərbaycan parlamentində "Toplaşmaq azadlığı haqqında" qanuna baxılacaq. Azərbaycan hökuməti və Avropa Şurası Venesiya Komissiyası arasında birgə müzaikrələrdən sonra "Toplaşmaq azadlığı haqqında" qanuna əlavə və dəyişikliklər tətbiq edilib. Müzakirələr zamanı Venesiya Komissiyası Azərbaycanın müxalifət partiyalarının fikirlərini də dinləyib.
Müxalifət aksiyaların keçirilməsinə dair qərarın qanuna əsasən yerli hakimiyyət orqanları tərəfindən verilməsini düzgün hesab etmir.
Məqalə müəllifi ilə əlaqə ünvanı: trend
