Azərbaycan,Bakı,11 iyun / Trend , müxbir K.Zərbalıyeva/ Korrupsiya cinayətində ittiham olunan "Loğman" tibb məktəbinin direktorunun məhkəməsi başlayıb.
Binəqədi rayon məhkəməsindən çərşənbə günü Trend -a bildirilib ki, prosesdə cinayət işi üzrə məhkəmənin hazırlıq iclası keçirilib. Məhkəmədən verilən məlumata görə, təqsirləndirilən Rəmziyyə Abdullayeva ifadə verib. O özünü ittiham üzrə təqsirli bilməyib.Onun ifadəsindən sonra bir neçə şahid ifadəsi dinlənilib.
Proses iyulun 4-də şahid ifadələri ilə davam etdiriləcək.
Məktəb direktoru Cinayət Məcəlləsinin vəzifə səlahiyyətlərini aşma (309.1-ci) maddəsi ilə ittiham olunur.
Direktor barəsində məhkəmənin qərarı ilə başqa yerə getməmək barədə qətimkan tədbiri seçilib.
"Loğman" Tibb Məktəbinin fəaliyyəti 2006-cı ilin may ayında Nazirlər Kabinetinin qərarı ilə dayandırılıb. Məktəbin qanunsuz tələbə qəbulu aparması faktı ilə bağlı cinayət işi başlanıb. Cinayət işinin istintaqı Respublika Prokurorluğunun Korrupsiyaya qarşı mübarizə idarəsində aparılıb.
Azərbaycanın təhsil naziri Misir Mərdanov mətbuata açıqlamasında bildirib ki, qanunsuz fəaliyyət göstərən "Loğman" Tibb Məktəbinin tələbələri başqa təhsil ocaqlarına köçürülməyəcəklər. ".
Təhsil Nazirliyinin qərarı ilə tibb sahəsində özəl ali məktəblərə tələbə qəbulu qadağan edilib. Tələbə Qəbulu üzrə Dövlət Komissiyası həmin qərara uyğun olaraq, 2007-2008-ci illər üçün həmin ali məktəbə tələbə qəbulu həyata keçirməyib.
Azərbaycan Nazirlər Kabinetinin qərarı ilə bağlanan "Loğman" özəl tibb məktəbinin tələbələri dövlət təhsil müəssisələrinə bərpa edilməyəcəklər.
İki il əvvəl "Loğman" Tibb Məktəbi Təhsil Nazirliyinin qərarı ilə bağlanıb. Lakin buna baxmayaraq, məktəb qeyri-leqal olaraq fəaliyyətini davam etdirib. Məktəb fəaliyyətini dayandırana qədər burada təxminən 2 min tələbə təhsil alırdı.
Mərdanov deyib ki, tələbələrin təhsildən kənarda qalmasının birbaşa məsuliyyəti məktəbin rəhbərliyinin üzərinə düşür.
Müəlliflə əlaqə saxlamaq üçün elektron ünvan - [email protected]
