Azərbaycan ombudsmanı sərbəst toplaşmaq azadlığının təmin edilməsində problem olmadığını bəyan edib
Azərbayan, Bakı, 07 oktyabr / Trend , müxbir İ.Əlizadə/ Azərbaycanın İnsan hüquqları üzrə müvəkkili (ombudsman) Elmira Süleymanova hesab edir ki, ölkədə sərbəst toplaşmaq azadlığının təmin olunması sahəsində problem yoxdur.
"Hər bir rayon və şəhərdə sərbəst toplaşmaq azadlığının təmin olunması üçün ən azı 5-6 qapalı yerlər və bir necə meydan müəyyən olunub", çərşənbə axşamı Trend -a Süleymanova bildirib.
Trend -un arayışı: Müxalifət partiyaları iddia edir ki, Azərbaycan hakimiyyəti kütləvi aksiyaların keçirilməsinə icazə verməməklə vətəndaşların sərbəst toplaşmaq hüququnu məhdudlaşdırır. Müxalifəti təmsil edən sağ-mərkəzçi Müsavat Partiyası kütləvi aksiyalara icazə vermədiyinə görə, Bakı Şəhər İcra Hakimiyyətini məhkəməyə verib.
Ombudsman qeyd edib ki, ölkədə prezident seçkisi ərəfəsində sərbəst toplaşmaq azadlığı təmin olunub.
Azərbaycanda prezident seçkisi oktyabrın 15-də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, hazırkı dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
"İcra hakimiyyəti orqanları tərəfindən ayrılan yerlərdə hər bir namizəd seçicilərlə görüşə, öz platformalarını onlara çatdıra bilər", - Süleymanova əlavə edib. Onun sözlərinə görə, istər fərdi şəkildə hansısa vətəndaş, istərsə də hər hansı təşkilat sərbəst toplaşmaq hüququnun məhdudlaşdırılması ilə bağlı Ombudsman Aparatına müraciət etməyib.
"Ombudsman Aparatı qərəzsiz, ədalətli və müstəqil bir qurumdur. Əgər sərbəst toplaşmaq hüququnun pozulmasına dair bizə hər hansı bir müraciət daxil olsaydı, ona mütləq reaksiya verərdik", - ombudsman bildirib.
Süleymanova bildirib ki, Ombudsman Aparatının əməkdaşları bölgələrdə müşahidələr aparır, yerli icra hakimiyyəti və hüquq-mühafizə orqanları ilə prezident seçkisi, vətəndaşların sərbəst toplaşmaq hüququnun təmin olunması və qanunun hər bir şeydən üstün olması ilə bağlı maarifləndirmə işi aparırlar.
"54 rayon və şəhər polis şöbələrində monitorinqlər və müzakirələr aparmışıq", - ombudsman qeyd edib.
Məqalə müəllifi ilə əlaqə ünvanı: [email protected]
