Azərbaycan, Şəki, 16 fevral / Trend , müxbir X.Əliyeva/ Azərbaycanın şimal-qərbində yerləşən Şəkinin adı (paytaxt Bakıdan 352 km. məsafədə) dünyanın Tarixi Şəhərlər Liqasına daxil edilib. Bu barədə Liqanın prezidenti Şəki bələdiyyəsinə məktub ünvanlayıb.
"Qədim şəhərin bu təşkilata üzvlük məsələsi Türkiyənin Konya şəhərində keçirilən Tarixi Şəhərlər Liqasının XI ümumdünya konfransında iştirak edən Şəki bələdiyyəsi tərəfindən gündəmə gətirilib", - bazar ertəsi Trend -a Şəki şəhər bələdiyyəsinin sədri Gülnaz Salamova bildirib.
Trend -un arayışı: Şəki şəhərinin adının dünyanın Tarixi Şəhərlər Liqasına daxil edilməsi məsələsi 2008-ci ilin oktyabr ayında Tarixi Şəhərlər Liqasının XI ümumdünya konfransında qaldırılıb.
Tarixi Şəhərlər Liqası dünyanın qədim tarixə malik və zəngin mədəni irsi olan şəhərlərin meriyaları tərəfindən təşəkkül tapıb. Bu təşkilatda dünyanın 52 ölkəsinin 78 qədim və gözəl şəhərləri təmsil olunur. Istanbul, Roma, Paris, Vyana, Budapeşt, Sankt-Peterburq, Amsterdam kimi dunyanın nəhəng şəhərləri bu liqanın üzvləridir. Artıq adı bu möhtəşəm qruma daxil olunan Şəki həmin təşkilata qəbul edilən ilk Azərbaycan şəhəridir.
Salamovanın sözlərinə görə, liqaya üzv qəbul olunmaları ilə bağlı təşkilatın prezidenti artıq onlara təbrik məktubu ünvanlayıb.
Məqalə müəllifi ilə əlaqə ünvanı:[email protected]
