Azərbaycan, Bakı, 13 oktyabr / Trend , müxbir H.Bağırov/
Bakıda "Azik" tikinti şirkətinin rəhbərinin cinayət işi üzrə məhkəmə prosesi başlayıb.
Trend -un məlumatına görə, Ağır Cinayətlərə Dair İşlər üzrə Məhkəmədə Cinayət Məcəlləsinin küllü miqdarda dələduzluq etmək (178.3.2) maddəsi ilə ittiham olunan Azər Həmzəyev məhkəmədə ifadə verib. O, elan olunmuş ittiham üzrə özünü təqsirli bilməyib. Bildirib ki, zərərçəkmiş vətəndaşları aldatmaq niyyəti olmayıb. Onun sözlərinə görə, vətəndaşlara ev tikmək adı ilə pul alıb, lakin həbs olunduğu üçün bunu sona çatdıra bilməyib.
2007-ci ilin noyabr ayında 35 yaşlı Bakı şəhər sakini, "Azik" tikinti şirkətinin rəhbəri Azər Nadir oğlu Həmzəyev Bakı sakini Müşviq Hüseynova bağ evi tikmək adı ilə onunla müqavilə bağlayıb və 100 min manat pul alıb. Lakin Həmzəyevin rəhbərlik etdiyi şirkətin əməkdaşları tikinti işlərini keyfiyyətsiz görüblər və tikinti işlərini sona qədər aparmayıblar.
Həmzəyev isə Hüseynovdan aldığı pulları mənimsəyib.
Bundan başqa, Həmzəyev 2007-2008-ci illər ərzində Bakı şəhərində daha 22 nəfəri aldadaraq, onların pullarını mənimsəyib. Həmzəyev vətəndaşların şikayəti əsasında həbs edilib.
Məqalə müəllifi ilə əlaqə ünvanı:[email protected]
