Azərbaycan, Bakı, 27 oktyabr / Trend , müxbir H.Bağırov/
Azərbaycanda hüquq müdafiəçisinin avtomobilindən oğurluq edən dəstənin məhkəməsi başlayıb.
Trend -un məlumatına görə, çərşənbə axşamı Ağır Cinayətlərə Dair İşlər üzrə Məhkəmədə avtomobillərdən külli miqdarda pul oğurlamaqda təqsirli bilinən Bakı şəhər sakinləri Məmmədov Ruslan Xosrov oğlu, Mehdiyev Səxavət İsa oğlu, Hüseynov Elgiz Eldar oğlu, Əliyev Zaur Ənvər oğlu və Həsənov Fətəli İdris oğlunun cinayət işi üzrə məhkəmənin hazırlıq iclası keçirilib. Məhkəmə baxışı noyabrın 3-nə təyin edilib.
Mütəşəkkil dəstə üzvlərinin ötən il yanvarın 29-da Heydər Əliyev prospekti, 98-də yerləşən MKTİK MMC şirkətində xəzinədar işləyən Cəfərov Rəşad Əbdülsəməd oğluna məxsus "Mercedes-180" markalı avtomobildən şüşələri sındırmaq yolu ilə şirkətə məxsus 74 min manat oğurladıqları müəyyənləşib.
Bundan başqa, dəstənin 2008-ci ilin iyununda Sarıyev Mehman Haqverdi oğluna məxsus "VAZ-2107" markalı maşından firmaya məxsus 69 min, ötən ilin aprelində Quliyev Səhman Dursun oğluna məxsus "Mercedes" markalı avtomobilindən 58 min ABŞ dolları, Məmmədli Çingiz Fəxrəddin oğluna məxsus "Tucson" markalı avtomaşından 39 min manat, İşgəncələr Əleyhinə Qarşı Azərbaycan Komitəsinin sədri Behbudov Elçin Tofiq oğluna məxsus "Tofaş" markalı avtomobildən 30 min manat, "Palma" kafesinin qarşısında Həşimov Nəriman İmran oğluna maşından 47 450 ABŞ dolları və 3000 manat, "Caspian Plaza"nın qarşısında Hüseynov Əliheydər İslam oğluna məxsus "Prado" markalı avtomaşının şüşəsini sındırmaqla 5000 manat və 4500 ABŞ dolları, Gülməmmədov Məhəmməd Bayandur oğluna məxsus "Mitsubishi-Pajero" markalı avtomobildən 8140 ABŞ dolları, "Qrand" mebel mağazasının qarşısında Nuriyev Cəbrayıl Əziz oğluna məxsus "Fiat-Albea" markalı avtomaşından 46 min ABŞ dolları, "Caspian-petrol" yanacaqdoldurma məntəqəsinin həyətində Kəlbiyev Mehrab Feruz oğluna məxsus "Prado" markalı avtomobildən 250 min rus rublu və 30 min ABŞ dolları, Sulutəpə qəsəbəsində Mirzəyev Ceyhun Əmiraslan oğluna məxsus "Mitsubishi-Pajero" markalı avtomaşından 7 min manat məbləğində telefon danışıq kartları və 1500 manat məbləğində müxtəlif valyuta və Səmədov Salehə məxsus "BMV-X5" markalı avtomobildən 40 min manat və 15 min ABŞ dolları oğurladığı sübuta yetirilib.
Məqalə müəllifi ilə əlaqə ünvanı: [email protected]