Azərbaycan, Bakı, 21 dekabr / Trend , müxbir K.Zərbalıyeva/
Azərbaycanda vakant dövlət qulluğu vəzifələrinin tutulması üçün keçirilən müsahibə başa çatıb.
Prezident yanında Dövlət Qulluğu Məsələləri üzrə Komissiyanın mətbuat xidmətindən çərşənbə axşamı Trend -a verilən məlumata görə, oktyabrın 23 və 31-də Komissiyanın dövlət orqanlarında inzibati vəzifələrin altıncı - doqquzuncu təsnifatlarına uyğun olan vakant dövlət qulluğu vəzifələrinin tutulması üçün elan etdiyi müsahibədə 94 namizəd uğur qazanıb. Onlar müvafiq vəzifələrə təyin olunmaq üçün dövlət orqanlarının rəhbərlərinə təqdim ediliblər.
23 oktyabr tarixində elan edilmiş müsahibəyə 25 dövlət orqanında inzibati vəzifələrin altıncı - doqquzuncu təsnifatlarına uyğun olan 224, 31 oktyabr tarixində elan edilmiş müsahibəyə isə 3 dövlət orqanında inzibati vəzifələrin altıncı - doqquzuncu təsnifatlarına uyğun olan 3 vakant dövlət qulluğu vəzifəsi çıxarılmışdı. Müsahibə üzrə sənədlərin qəbulu müvafiq olaraq 2009-cu il 11 və 19 noyabr tarixlərdə başa çatmış və 194 (42-si qadın, 152-si isə kişi) namizəd qeydə alınmışdı.
Namizədlərlə müsahibə noyabrın 20-də başlamış və dekabrın 18-də başa çatmışdı.
Müsahibəyə ən çox vakant vəzifə çıxaran dövlət qurumu - Əmlak Məsələləri Dövlət Komitəsi (227 vakant dövlət qulluğu vəzifəsindən 38-i ), ən çox namizədin qeydə alındığı dövlət orqanı - İqtisadi İnkişaf Nazirliyi (ümumilikdə qeydə alınan 194 namizəddən 56-sı), heç bir namizədin qeydə alınmadığı dövlət orqanları - Qaçqınların və Məcburi Köçkünlərin İşləri üzrə Dövlət Komitəsi (2 vakant vəzifə), Kənd Təsərrüfatı Nazirliyi yanında Dövlət Baytarlıq Xidməti (1 vakant vəzifə), İnsan Hüquqları üzrə Müvəkkil (Ombudsman) (1 vakant vəzifə), Naftalan Şəhər Məhkəməsi (1 vakant vəzifə), Xızı Rayon Məhkəməsi (1 vakant vəzifə) olub.
Ən çox namizədin uğur əldə etdiyi dövlət orqanı - İqtisadi İnkişaf Nazirliyi (Nazirlik üzrə qeydiyyatdan keçmiş 56 namizəddən 35-i), heç bir namizədin keçmədiyi dövlət orqanları - Dini Qurumlarla İş üzrə Dövlət Komitəsi (7 namizəd), Ekologiya və Təbii Sərvətlər Nazirliyi (1 namizəd) və Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi (1 namizəd) olub.