Azərbaycan, Bakı, 22 yanvar / Trend , müxbir H.Bağırov/
Azərbaycanda dövlətə xəyanətdə ittiham olunan hərbi qulluqçunun məhkəməsi başlayıb.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Müdafiə Nazirliyinin "N" saylı hərbi hissəsinin əsgəri Namiq Hüseyn oğlu Rəcəbovun cinayət işi üzrə məhkəmənin hazırlıq iclası keçirilib.
Məhkəmə baxışı fevralın 1-nə təyin edilib.
Rəcəbov Cinayət Məcəlləsinin dövlətə xəyanət (274), Azərbaycan Respublikasına qəfil hücumun vaxtında aşkara çıxarılması və dəf olunması üzrə, yaxud onun təhlükəsizliyinin təmin edilməsi üzrə döyüş növbəsi (döyüş xidməti) çəkmə qaydalarını pozma (338.1), Odlu silahı, döyüş sursatını, partlayıcı maddələri və qurğuları talama və ya hədə-qorxu ilə tələb etmə (232) maddələri ilə ittiham olunur.
Rəcəbov Tovuz rayonunda yerləşən hərbi hissədə xidmətdə olduğu müddətdə bölük komandiri, gizir Anar Allahverdiyev tərəfindən Ermənistan xüsusi xidmət orqanlarının əməkdaşlarına təhvil verilib. Erməni xüsusi xidmət orqanlarının əməkdaşları Rəcəbova qarşı cinsi zorakılıq ediblər və həmin hadisənin videoçəkilişini aparıblar. Onlar həmin videoçəkiliş vasitəsi ilə Rəcəbovu şantaj ediblər və ondan dövlət əhəmiyyətli hərbi sirləri alıblar.
Allahverdiyev 2009-cu ildə Ağır Cinayətlərə Dair İşlər üzrə Hərbi Məhkəmənin hökmü ilə 14 il müddətinə azadlıqdan məhrum edilib.
