Gürcüstan, Tbilisi, 17 mart / Trend , müxbir C.Babayeva/
Trend News-un Azərbaycanın Diaspora İş üzrə Dövlət Komitəsinin Gürcüstanda yaşayan azərbaycanlılarla iş şöbəsinin müdiri Füzuli Nəcəfovla müsahibəsi
- Gürcüstan azərbaycanlılarının hazırkı durumunu necə qiymətləndirirsiniz?
- Azərbaycan dövləti həmişə Gürcüstanda yaşayan azərbaycanlıların problemlərinə diqqətlə yanaşıb. 2004-cü ilə qədər Gürcüstan azərbaycanlıları ölkəni kütləvi şəkildə tərk edirdilər. Azərbaycanın Diaspora İş üzrə Dövlət Komitəsi tərəfindən soydaşlarımızın bütün problemlərinin yaranma səbəbləri araşdırıldı, onların aradan qaldırılma yolları müəyyən edildi və bununla bağlı Azərbaycan hökumətinə geniş arayış təqdim olundu. Həmin dövrdən bu günə qədər soydaşlarımızın Gürcüstanı tərk etməsi prosesi azalmağa başlayıb. Bu da ondan irəli gəlir ki, Azərbaycan hökumətinin köməyi ilə paralel olaraq, Gürcüstan hökuməti də ölkədə yaşayan milli azlıqların ölkənin ictimai-siyasi həyatında iştirakında maraqlıdır. Gürcüstanda azərbaycanlıların təmsil olunduğu 40-dan artıq QHT var və onların, təxminən, yarısı gənclər təşkilatlarıdır. Dövlət komitəsi ilə əməkdaşlıq edən və azərbaycanlıların problemlərinin həllinə çalışan təşkilatlar Marneulidə Azərbaycan Mədəniyyət Mərkəzi, Gürcüstan Azərbaycanlıları Konqresi, Qeyrət Xalq Hərəkatı, "Tolerance" İctimai Birliyi, Ziyalılar Birliyi və digərləri fəaldır. Dövlət Komitəsi mövcud təşkilatlarla yanaşı, yeni yaradılan təşkilatların fəaliyyətinə də dəstək verəcək.
- Bolnisi rayonunun Faxralı kəndində bərpa olunan məscidlə bağlı yaranmış problemin həlli hazırda nə yerdədir?
- Ötən ilin dekabrında Dövlət Komitəsinin nümayəndələri Faxralıya gedib və problemlə yerindəcə tanış olublar. Problem araşdırılarkən məlum oldu ki, 100 ildən artıq yaşı olan məscidin dövlət qeydiyyatı yoxdur. Hər bir milli azlıq kimi, Gürcüstan azərbaycanlılarının da hüquqlarını müdafiə etmək, adət-ənənə, din və dilinin saxlanılması üçün xüsusi hüquq və imtiyazları var. Bolnisi rayonunun yerli icra nümayəndələri söz verdilər ki, sənədləşmə sahəsində məscidin bərpası ilə məşğul olan təşəbbüs qrupuna köməklik göstərəcəklər. Hələlik bu məsələ həll olunmamış qalır. Bu məsələ ilə yalnız Dövlət Komitəsi deyil, müvafiq dövlət qurumları da məşğuldur. Sözügedən problem bu yaxınlarda Kvemo-Kartli qubernatorunun Azərbaycana səfəri zamanı da müzakirə olunub. Qarşılıqlı müzakirələr bunu deməyə əsas verir ki, yaxın zamanlarda məsələ həllini tapacaq.
- Gürcüstanda azərbaycandilli məktəblərin mövcud bəzi problemləri onları bağlanmaq təhlükəsi ilə üz-üzə qoya bilərmi?
- Hesab edirəm, azərbaycandilli məktəblərin bağlanma təhlükəsi yoxdur, amma qabaqlayıcı tədbirlər kimi azərbaycanlı gənclərin güzəştli şərtlərlə təhsil alıb həmin məktəblərdə fəaliyyət göstərməsi mütləq vacibdir. Düşünürəm, yaxın beş ildən sonra bu problem tədricən həllini tapacaq. Azərbaycandilli məktəblərdə müəllimlərin əksəriyyətinin yaşı 60-dan yuxarıdır. Bununla bağlı Azərbaycan və Gürcüstanın təhsil nazirlikləri müvafiq razılığa gəlib, bu problemin həllini tapa bilərlər. Belə ki, müəllim çatışmazlığı yaxın gələcəkdə azərbaycandilli məktəblərlə bağlı vəziyyətin gərginləşməsinə səbəb ola bilər.
- Gürcüstanın azərbaycanlılar yaşayan rayon və kəndlərində xaçların basdırılması narazılıqla qarşılanmışdı. Bu məsələ ilə əlaqədar Diasporla İş üzrə Dövlət Komitəsi araşdırma aparıbmı?
- Xaçların basdırılması ən çox Bolnisi rayonunda geniş vüsət alıb. Gürcüstan tərəfinin bildirdiyinə görə, xaçlar dinə uyğun olaraq basdırılıb. Amma sözsüz ki, müsəlman qəbiristanlıqları və məscidlərin yanında xaçların basdırılması müəyyən qıcıq yaradır. Bu məsələ ilə bağlı Dövlət Komitəsi irad və təkliflərini verib.
Sonda bildirmək istərdim ki, Gürcüstan azərbaycanlıları hüquqlarını qorumaqla bərabər, vətəndaşları olduqları dövlətin qanunlarına riayət etməlidirlər. Bəzən bütün ölkə üzrə mövcud olan problemi hər hansı bir bölgə üçün xüsusiləşdirmək, problemi vahimə və faciə kimi ictimaiyyətə təqdim etmək düzgün yanaşma deyil.
