Azərbaycan, Bakı, 2 noyabr /Trend, müxbir K.Zərbalıyeva/
Azərbaycanda ədliyyə naziri yanında fəaliyyət göstərən İctimai Komitənin yeni tərkibinin formalaşdırılması üçün qeyri-hökumət təşkilatlarına müraciət olunub.
Ədliyyə Nazirliyinin mətbuat xidmətindən çərşənbə axşamı Trend-ə verilən məlumata görə, məhkumların islah edilməsində və penitensiar müəssisələrin fəaliyyətinə ictimai nəzarətin həyata keçirilməsində ictimaiyyətin iştirakını təmin edən İctimai Komitənin dördüncü tərkibinin səlahiyyət müddəti bu il dekabrın 28-də başa catır.
Bununla əlaqədar insan hüquqlarının müdafiəsi istiqamətində fəaliyyət göstərən qeyri-hökumət təşkilatlarının və hüquq müdafiəçilərinin nəzərinə çatdırılır ki, İctimai Komitənin fəaliyyətində iştirak etmək istəyənlər öz proqram və təklifləri ilə respublika Ədliyyə Nazirliyinə - Seçki Komissiyasına bu il dekabrın 10-dək müraciət edə bilərlər.
Komitənin fəaliyyəti ədliyyə nazirinin 25 aprel 2006-cı il tarixli əmri ilə təsdiq edilərək dövlət qeydiyyatına alınmış qaydalara əsasən həyata keçirilir.
Komitənin tərkibi aidiyyəti dövlət, habelə qeyri-hökumət təşkilatlarının nüfuzlu nümayəndələrindən, ictimai xadimlərdən ibarət olan Seçki Komissiyası tərəfindən seçilir.
