...

Azərbaycan Xəzərin Su Bioresursları Komissiyasına sədrlik edəcək

Cəmiyyət Materials 22 Noyabr 2010 13:27 (UTC +04:00)

Azərbaycan, Bakı, 22 noyabr /Trend, müxbir D.Xatınoğlu/

Azərbaycan Xəzərin Su Bioresursları Komissiyasına sədrlik edəcək. Bu barədə bazar ertəsi Trend-ə komissiyanın daimi üzvü, Azərbaycan Ekologiya və Təbii Sərvətlər Nazirliyinin Su hövzəsində bioloji resursların artırılması və mühafizəsi departamentinin müşaviri Taryel Məmmədli bildirib.

Məmmədlinin sözlərinə görə, dekabrın 22-də İranda Xəzərin Su Bioresursları Komissiyasının 32-ci iclası həyata keçiriləcək və bu iclasdan sonra komissiyaya sədrlik iki il müddətində Azərbaycana tapşırılacaq.  Xəzəryanı ölkələrə Azərbaycan, Rusiya, Qazaxıstan, İran və Türkmənistan daxildir.

Xəzərin Su Bioresursları Komissiyası 18 ildir fəaliyyət göstərir və hazırda komissiyaya Tehran sədrlik edir.

Xəzərin Su Bioresursları Komissiyasının iyunun 14-16-da İran İslam Respublikasının paytaxtı Tehran şəhərində keçirilmiş 31-ci iclasında imzalanmış protokola əsasən, 2010-cu il üçün Azərbaycanın ümumi ov kvotası 84 ton (nərə balığı üzrə 46 ton, uzunburun balığı üzrə isə 38 tondur), İranın 403 ton, Qazaxstanın 171 ton, Rusiyanın 268 ton və Türkmənistanın ümumi ov kvotası 62 ton müəyyənləşdirilib.

Xəbər lenti

Xəbər lenti