Azərbaycan, Bakı, 14 yanvar /Trend, müxbir T.Hacıyev/
Azərbaycanda bu il 86 mövzu üzrə müdafiə təyinatlı məmulatlar yaradılacaq və onların sınaqları keçiriləcək. Trend-in Azərbaycanın Müdafiə Sənayesi Nazirliyinə istinadən verdiyi məlumata görə, bu barədə nazir Yavər Camalovun sədrliyi ilə keçirilən səyyar müşavirələrdə 2011-ci ilin "Dövlət Müdafiə Sifarişi Proqramı"nın layihəsi müzakirə edilərkən qeyd olunub. Müşavirələrdə istehsalat birlikləri üzrə 2010-cu ilin yekunları barədə məlumatlar da dinlənilib.
Cari ildə müdafiə təyinatlı məmulatların istehsal həcminin ötən ilə nisbətən 4 dəfədən çox artırılması, mülki məmulatlar üzrə istehsal həcminin genişləndirilməsi və çeşid sayının 15 faiz artımı nəzərdə tutulur.
Müşavirələrdə nazir Yavər Camalov 2011-ci ilin "Dövlət Müdafiə Sifarişi Proqramı"nın icrasının təmini məqsədilə nazirliyin tabeli müəssisələrinin yeni texnologiya və avadanlıqlarla təchizatı ilə bağlı tapşırıqlar verib.
Nazir bildirib ki, tabeli müəssisələrin 2010-cu il üzrə fəaliyyətlərinin yekunları keçiriləcək kollegiya iclasında geniş şəkildə müzakirə ediləcək.
Azərbaycan Müdafiə Sənayesi Nazirliyi 2005-ci ildə yaradılıb. Keçən dövr ərzində Azərbaycan Silahlı Qüvvələrinin döyüş sursatları ilə təchizatında xarici ölkələrdən asılılıq aradan qalxıb.