Azərbaycan, Bakı, 13 sentyabr /Trend, müxbir İ.İsabalayeva/
Azərbaycan və Türkiyə arasında səhiyyə sahəsində əməkdaşlıq müzakirə ediləcək. Trend-in məlumatına görə, bunu Azərbaycanda keçirilən Ümumdünya Səhiyyə Təşkilatının Avropa Regional Komitəsinin 61-ci sessiyasında iştirak etmək üçün Bakıya səfər edən Türkiyə səhiyyə naziri Rəcəb Akdağ jurnalistlərə açıqlamasında bildirib.
O deyib ki, Türkiyə Azərbaycanla səhiyyə sahəsi üzrə genişmiqyaslı əməkdaşlıq edir.
Nazir təcrübə mübadiləsi üçün Azərbaycanın səhiyyə naziri Oqtay Şirəliyevi öz ölkəsinə dəvət edəcəyini də bildirib.
"Bu iki ölkə öz təcrübələrini bölüşür. Qarşıdakı günlərdə də bunun davam etdiriləcəyi gözlənilir. Səfər bu təcrübələrin mübadiləsi üçün əhənmiyyətli olacaq",- türkiyəli nazir qeyd edib.
Azərbaycanın son illərdə səhiyyə sahəsində çox böyük irəliləyişlər əldə etdiyini deyən Akdağ ölkəmizin səhiyyə sahəsində mühüm işlər həyata keçirdiyini vurğulayıb.
...