Azərbaycan, Bakı, 26 sentyabr /Trend, müxbir H.Vəliyev/
"AzəriCard" prosessinq mərkəzi mobil bankçılığın yeni versiyasını işə salıb. Bu barədə Trend-ə bazar ertəsi "AzəriCard"ın Biznesin inkişafı şöbəsinin rəhbəri Cahangir Məmmədov bildirib.
Onun sözlərinə görə, mobil bankçılığın yeni versiyasının xüsusiyyətləri ondan ibarətdir ki, o, konktret mobil operatora bağlı deyil və mobil ödənişlərə çıxış bütün üç mobil operatorun (Bakcell , Azercell və Azerfon) abonentlərinin hamısı üçün mümkündür. Bu, məlumatların ötürülməsi texnologiyaları (GPRS, EDGE, Wi-Fi və başqaları) sayəsində baş verir.
Xidmətlərdən istifadə üçün əlavə proqramın yaxın vaxtlarda istər "AzeriCard"ın internet-resurslarında, istərsə də bu xidmətdən artıq istifadə edən bankların saytlarında yüklənməsi vacibdir.
"Mobil bankçılığın yeni versiyasının üstünlüyü ondan ibarətdir ki, banka getməyə, Sim-kartı dəyişməyə və s. ehtiyac yoxdur. Proqram artıq bütün bankomatlara, mobil bankçılığın əvvəlki versiyasından istifadə etmiş bank müştərilərinə paylanılıb", - Məmmədov deyib.
Mobil bankçılıq xidməti bütün gün ərzində onlayn rejimdə balans hesabını yoxlamağa, hesab üzrə əməliyyat barədə hesabatları formalaşdırmağa, elektrik enerjisi, mobil və stasionar rabitə üzrə hesabları ödəməyə, kartdan karta pul vəsaitləri köçürməyə, aviabiletlərin elektron alışını və keçirilən hər bir əməliyyat barədə SMS-xəbərdarlığı (hesaba vəsaitin daxil olması və ya silinməsi) almağa imkan verir.
Yeni proqramın əsas fərqi onun genişlənmiş funksionallığıdır.
O, texniki səbəblər üzündən əvvəlki versiyalarda olmayan əlavə funksiyalara malikdir. Yeniliklər ondan ibarətdir ki, istiafdəçilər müxtəlif xidmət kateqoriyalarını, kartların bloklaşdırılmasını, istənilən vaxtda hesabdan silinməni apara bilərlər. Mobil bankçılıq sisteminə mərhələli şəkildə mərkəzin göstərdiyi başqa xidmətlər də daxil ediləcək.
