Azərbaycan, Bakı, 5 dekabr /Trend, müxbir K.Zərbalıyeva/
Aşura günü ilə əlaqədar Bakıda polis gücləndirilmiş iş rejimində çalışacaq.
Bakı şəhər Baş Polis İdarəsindən bazar ertəsi Trend-ə bildirilib ki, Bakıda müəyyən edilmiş yerlərdən kənarda Aşura mərasimlərinin keçirilməsinə yol verilməyəcək.
İdarədən bildirilib ki, mərasimlərin keçiriləcəyi yerlər dəqiqləşdirilib, ictimai qaydanın və təhlükəsizliyin təmin edilməsi məqsədi ilə həmin ərazilərdə əlavə polis naryadları təyin olunacaq.
Dövlət Yol Polisi də Aşura günü gücləndirilmiş iş rejimində çalışacaq.
Bakı şəhər Baş Dövlət Yol Polisi İdarəsinin bölmə rəisi Vaqif Əsədov Trend-ə bildirib ki, mərasimlərin keçiriləcəyi məscidlərin yerləşdiyi ərazilərə gedən yollarda sıxlığın yaranmaması, əhalinin təhlükəsizliyinin təmini üçün nəqliyyatın hərəkəti məhdudlaşdırılacaq.
Əsədov vətəndaşlara həmin istiqamətlərdə şəxsi nəqliyyat vasitələrindən mümkün qədər az istifadə olunmasını tövsiyyə edir.
Qafqaz Müsəlmanları İdarəsinin (QMİ) Qazilər Şurası Məhərrəm ayı ilə bağlı fətva verib.
Fətvaya əsasən, Məhərrəm 1433-cü ilin başlanğıcı - Məhərrəm ayının 1-i miladi təqvimlə 2011-ci il noyabr ayının 27-nə təsadüf edir. Aşura günü 2011-ci il dekabr ayının 6-dadır.
"Aşura günü məscidlərdə, ibadət ocaqlarında ictimai asayiş qaydalarına riayət olunmaqla keçirilməli, təziyə məclislərində Kərbala şəhidlərinin ruhuna xütbələr oxunmalıdır", - fətvada deyilir.
Məhərrəm ayı Hicri-qəməri təqvimlə İslam dininin birinci ayıdır. Bu ayın Aşura günündə İmam Hüseyn əleyhissalam və yaxınları Yəzid ibn Müaviyyənin qoşunları tərəfindən qətlə yetirilib.
"Aşura günü zəncir vurub bədənə xəsarət yetirmək yolverilməzdir, müqəddəs məkanlarda nizam-intizam pozulmamalıdır. Son illər təziyə günündə idarənin təşəbbüsü ilə keçirilən qanvermə aksiyaları ən münasib təziyədarlıq nümunəsi kimi örnək olmalıdır", - fətvada qeyd edilir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
