Azərbaycan, Bakı, 8 fevral / Trend müxbir M.Əliyev/
Təhsil Nazirliyi Bakıda çovğunlu hava ilə bağlı məktəblərin bağlanmasına dair hər hansı qərar qəbul etməyib. Bu barədə Trend-ə çərşənbə günü Təhsil Nazirliyinin mətbuat xidmətinin rəhbəri Bayram Hüseynzadə bildirib.
"Bu gün Bakının məktəblərində istilik problemi yoxdur", - Hüseynzadə deyib.
Onun sözlərinə görə, məktəblərə yaxın yaşayan şagirdlər təhsilini davam etdirə bilər, lakin məktəbdən uzaqda yaşayan və nəqliyyat problemi olanlar dərsə gəlməyə bilərlər. "Əsas olan uşaqların cansağlığıdır", - mətbuat xidmətinin rəhbəri bildirib.
Ekologiya və Təbii Sərvətlər Nazirliyinin (ETSN) Milli Hidrometeorologiya Departamentinin Hidrometeoroloji Proqnozlar Bürosundan daha əvvəl Trend-ə verilən məlumata görə, çərşənbə günü şaxtalar güclənəcək.
Fevralın 7-dən 8-nə keçən gecə və 8-dən 9-na keçən gecə Bakıda minimal temperaturun 6-10 dərəcə şaxta təşkil edəcəyi gözlənilir. Yaxın günlərdə ən kəskin hava şəraitinin fevralın 8-də olacağı gözlənilir. Həmin gün günorta saatlarında temperatur 3-5 dərəcə şaxta olacaq, çovğun müşahidə olunacaq.
Azərbaycanın rayonlarında fevralın 9-u səhərədək fasilələrlə qar yağacaq. Fevralın 7-si axşamdan yağıntıların intensivləşəcəyi, fevralın 8-də isə bəzi yerlərdə qarın güclü yağacağı gözlənilir.
Qeyd edək ki, son 10 gündə Bakıda iki dəfə çovğunla müşahidə olunan hava şəraiti qeydə alınıb.