Azərbaycan, Bakı, 12 mart /Trend, müxbir İ.İsabalayeva/
Ümumdünya Səhiyyə Təşkilatı (ÜST) tərəfdaşlarla birgə vərəmin qarşısını almaq üçün 10 yeni vaksin və preparat üzərində işləyir. Trend-in məlumatına görə, bunu 24 mart - Ümumdünya Vərəmlə Mübarizə Günü ilə əlaqədar keçirilən tədbirdə ÜST-nin Azəbaycandakı nümayəndəliyinin yolucuxu xəstəliklər üzrə mütəxəssisi Cəvahir Süleymanova bildirib.
O deyib ki, ÜST vərəmdən ölüm hadisələrinin sayını 2015-ci ilədək iki dəfə azaltmağa çalışır. Son 20 il ərzində bu xəstəlikdən ölüm 40 faizədək azalıb. 2010-cu ildə vərəmlə xəstələnənlərin sayı 8,8 milyona qədər azalıb.
Lakin aparılan hesablamalara görə, bütün dünyada vərəmlə xəstələnmə hallarının üçdə biri qeydiyyata alınmır.
Süleymanova deyib ki, vərəm dünyada 15-44 yaşlı qadınlar arasında üç əsas ölüm səbəblərindən biridir. Amma maliyyələşdirmə kifayət qədər olmadığından, hazırkı nailiyyətlər təhlükə altındadır.
2012-ci ildə dünyada vərəmin müalicəsinə ayrılan vəsaitin 82 faizi Qlobal Fond tərəfindən maliyyələşdirilir.
Qiymətləndirməyə əsasən, istənilən zaman həbsxanalarda 8-10 milyon dustaq olur. Vərəmin həbsxnalarda qeydə alınma dərəcəsi mülki əhali arasında xəstəliyin yayılma dərəcəsindən 100 dəfə yüksəkdir.
Vərəmin aşkarlanması vacib məsələdir. 2011-ci ilin dekabrında ÜST Coxsaylı Dərmanlara Davamlı Vərəmin yeni ekspert testini təqdim edib. O, artıq 26 ölkədə tətbiq edilir.
Hökumətlərin vərəm xidmətlərini pulsuz və universal təmin etmək öhdəlikləri var.