Azərbaycan, Bakı, 7 noyabr /Trend, müxbir İ.İsabalayeva/
Sabahdan Azərbaycanda hava pisləşəcək, temperatur enəcək.
Ekologiya və Təbii Sərvətlər Nazirliyi Milli Hidrometeorologiya Departamentindən Trend-ə bildiriblər ki, noyabrın 8-də gün ərzində güclənən şimal küləyi havanın temperaturunun aşağı enməsinə səbəb olacaq.
Bakıda və Abşeron yarımadasında noyabrın 8-də hava şəraitinin dəyişkən buludlu olacağı, arabir tutulacağı, gün ərzində şimal-qərb küləyinin güclənəcəyi gözlənilir.
Havanın temperaturu gecə 12-15, gündüz 16-19 dərəcə isti təşkil edəcək.
Azərbaycanın rayonlarında noyabrın 8-də gecə və səhər bəzi yerlərdə duman, çiskin olacağı, günün ikinci yarısında əsasən şimal və şərq rayonlarında yağış yağacağı gözlənilir. Arabir güclənən qərb küləyi əsəcək.
Havanın temperaturu gecə 10-15, gündüz 19-24, dağlarda gecə 3-8, gündüz 12-17 dərəcə isti olacağı gözlənilir.