Azərbaycan, Bakı, 19 aprel /Trend, müxbir A.Məmmədov/
Lənkəran Ağır Cinayətlər Məhkəməsində bələdiyyə sədrinin oğlunu qətlə yetirməkdə ittiham olunan Hənifə Əliyev və İlham Əliyevin cinayət işi üzrə məhkəmə başa çatıb.
Trend-in məlumatına görə, hakim Cəlil Nəbiyevin sədrliyi ilə keçirilən prosesdə təqsirləndirilən şəxslərə hökm oxunub. Məhkəmənin hökmü ilə Hənifə Əliyev və İlham Əliyev hər biri 13 il 6 ay müddətinə azadlıqdan məhrum ediliblər.
İttihama görə, ötən il iyulun 16-da, saat 19:40 radələrində İmişli rayonunun Qulubəyli kənd sakini, 1948-ci il təvəllüdlü Hənifə Əliyev və oğlu İlham Əliyev həmkəndliləri - yetkinlik yaşına çatmayan 1995-ci il təvəllüdlü Mirnahid Nağıyevi kustar üsulla hazırlanmış odlu silahla qətlə yetiriblər.
Hənifə Əliyev Qulubəyli kənd icra nümayəndəsinin qardaşı oğlu, Mirnahid Nağıyev isə kənd bələdiyyə sədrinin oğludur.