Azərbaycan, Bakı, 30 aprel /Trend, müxbir İ.İzzət/
Xocalı faciəsi və Qarabağ həqiqətlərinin dünya ictimaiyyətinə çatdırılması sahəsində gördüyü işlərə, Azərbaycan-Türkiyə əlaqələrinin inkişafında göstərdiyi xidmətlərə görə TRT-nin baş direktoru İbrahim Şahin Bakıda Azərbaycan Jurnalist Qadınlar Assosiasiyasının (AJQA) xüsusi mükafatı olan "Media ulduzu" ilə təltif edilib.
AJQA-nın mətbuat xidmətindən Trend-ə verilən məlumata görə, mükafat İbrahim Şahinə Bakıda assosiasiyanın təşkilatçılığı ilə keçirilən "Azərbaycan-Türkiyə əlaqələrinin inkişafında TRT-nin rolu" adlı "dəyirmi masa"da təqdim olunub.
AJQA-nın prezidenti Sevil Yusifova bildirib ki, TRT-nin reytinq qazanmış proqramlarında Qarabağ məsələsi və Azərbaycan tarixi tez-tez işıqlandırılır, Azərbaycan mədəniyyəti təbliğ olunur.
"Bütün bunlar qardaşlığımıza və dostluğumuza xidmət edən fəaliyyətdir", - Yusifova əlavə edib.
Qeyd edək ki, "dəyirmi masa"da TRT-nin baş direktoru İbrahim Şahinlə yanaşı, baş direktorun müavini Zeynel Koç, xarici əlaqələr şöbəsinin müdiri Ayşen Diker, Anadolu Universitetinin rektoru Davud Aydın və Azərbaycanın aparıcı media qurumlarının rəhbərləri iştirak ediblər.