Bakı. Trend:
Məktəblilərin payız tətili ilə əlaqədar şagirdlərin yenidən ölkənin regionlarına səfərləri başlayıb. "Ölkəmizi tanıyaq" layihəsi çərçivəsində qərb bölgəsinin məktəbliləri cənub regionuna 4 günlük səfərə yola düşüb. Trend-in məlumatına görə, səfər çərçivəsində bölgə ilə əyani tanışlıq, tarixi yerlərə ekskursiya olacaq.
Tur-aksiya çərçivəsində Gəncə məktəbliləri Heydər Əliyev park-kompleksindəki Zəfər tağının qarşısından Lənkərana yola düşüblər. Şəhərin müxtəlif məktəblərindən olan 40 şagird Lənkəranın gəzməli-görməli, tarixi yerlərinə səfər edəcək. Bu dəfəki aksiyada 32 şəhər və rayondan 1280 şagird Lənkəran, Quba, Şəki və Gəncəyə səfər edəcək.
Layihə başlayandan isə 74 şəhər və rayondan 3 mərhələdə 7 istiqamət üzrə, ümumilikdə 4 minə yaxın şagird "Ölkəmizi tanıyaq" adı altında maarifləndirici tur-aksiyalara qatılıb.
Göygöllü məktəblilər də cənub bölgəsinə yola salınıb. 4 günlük tur çərçivəsində şagirdlər Lənkəran, Lerik və Astarada olacaq, bölgənin tarixi abidələri və istehsal müəssisələri ilə tanış olacaqlar. Aksiya iştirakçıları bu ekskurisyaların təşkilini yüksək qiymətləndiriblər.
Nəzrin Nəbiyeva məktəbli - "Ölkəmizi tanıyaq" layihəsi çərçivəsində bu mənim ilk səfərim deyil. Bundan öncə Qubada olmuşuq. İnanıram ki, qarşıdakı 4 gün ərzində mənalı istirahətlə yanaşı, bölgə haqqında müəyyən bilgilər də əldə edəcəyik.
Kəmalə Qəmbərli məktəbli - Bu gün biz "Ölkəmizi tanıyaq" layihəsi çərçivəsində cənub rayonlarına səfərə gedirik. Lənkəranı görmək mənim çoxdanki arzum idi.
Aytac Əliyeva məktəbli - Bu layihədə ilk dəfədir iştirak edirəm. Lənkəran rayonuna səfər etdiyim üçün çox məmnunam.
Tovuzdan olan 35 şagird və 5 müəllim də "Ölkəmizi tanıyaq" layihəsi çərçivəsində cənub regionuna yola düşüb. Səyahət edəcəkləri rayonların mədəniyyəti, mərkəz və muzeyləri, meydan və qalereyalarını gəzmək imkanı əldə edən məktəblilər bölgənin iqlimi üçün xarakterik olan bitkilərin becərilmə prosesi ilə də tanış olmaq imkanı qazanacaqlar.
Səhər saatlarında Ağstafadan olan məktəblilər də Lənkərana gedib. Məktəblilər cənub bölgəsi ilə yaxından tanış olmaqla, rayonların sosial, mədəni həyatı barədə əyani şəkildə məlumatlandırılacaqlar. Tur-aksiya şagirdlərə ölkə barədə ərtaflı məlumat qazandırmaqla yanaşı, eyni zamanda, məktəblilər arasında əlaqələrin qurulması və dostlar qazanmaq imkanı da yaradır. Məktəblilər bu gün axşam saatlarında cənub regionunda olacaqlar.
Trend-in ən mühüm və maraqlı xəbərlərini "Telegram"da izləyin
.jpg)
.jpg)
