...

Azərbaycanda tərbiyə işinə səhlənkar yanaşan valideynlər üçün cərimə artırılır

Cəmiyyət Materials 10 Dekabr 2015 15:33 (UTC +04:00)
Azərbaycanda yetkinlik yaşına çatmayanların tərbiyə və təlimi vəzifələrini lazımınca yerinə yetirməyən valideynlər üçün müəyyən edilən cərimənin məbləği artırılır.
Azərbaycanda tərbiyə işinə səhlənkar yanaşan valideynlər üçün cərimə artırılır

Trend-i buradan izləyin

Bakı. İlhamə İsabalayeva - Trend:

Azərbaycanda yetkinlik yaşına çatmayanların tərbiyə və təlimi vəzifələrini lazımınca yerinə yetirməyən valideynlər üçün müəyyən edilən cərimənin məbləği artırılır.

Trend-in məlumatına görə, Milli Məclisin Ailə, qadın və uşaq məsələləri komitəsinin bu gün keçirilən iclasında İnzibati Xətalar Məcəlləsinin 51-ci maddəsinin yeni redaksiyada verilməsi təklif edilib.

Belə ki, Azərbaycanda yetkinlik yaşına çatmayanların tərbiyə və təlimi vəzifələrinin valideynlər və ya onları əvəz edən şəxslər tərəfindən üzrlü səbəblər olmadan yerinə yetirilməməsinə və ya lazımınca yerinə yetirilməməsinə görə onlara xəbərdarlıq ediləcək və ya 40 manatdan 60 manatdək miqdarda cərimə ediləcək.

Hazırda bu maddədə "üzrlü səbəblər" xüsusi olaraq qeyd edilməyib. Eyni zamanda, hazırkı məcəllələyə görə, yetkinlik yaşına çatmayan uşaqların tərbiyə və təlimi vəzifələrinin valideynlər və ya onları əvəz edən şəxslər tərəfindən yerinə yetirilməməsinə və ya lazımınca yerinə yetirilməməsinə görə xəbərdarlıq edilir və ya 20 manatdan 40 manatadək miqdarda cərimə edilir.

Komitənin sədri Aqiyə Naxçıvanlı bildirib ki, "Yetkinlik yaşına çatmayanların baxımsızlığının və hüquq pozuntularının profilaktikası haqqında" və "Yetkinlik yaşına çatmayanların işləri və hüquqlarının müdafiəsi üzrə komissiyalar haqqında Əsasnamə"də dəyişiklik edilməsi barədə qanun layihələrində də valideynlərin öz vəzifələrini yerinə yetirməməsi ilə bağlı maddələrdə həmin hissənin valideynlərin öz vəzifələrini "üzrlü səbəblər olmadan" yerinə yetirməməsi kimi verilməsi təklif edilir.

Qanun layihəsinə görə, yetkinlik yaşına çatmayanların tərbiyəsi, təhsili və ya saxlanılması üzrə öz vəzifələrini üzrlü səbəblər olmadan yerinə yetirmədikdə və ya onların davranışına mənfi təsir göstərdikdə, yaxud onlarla qəddar rəftar etdikdə valideynlər və ya digər qanuni nümayəndələr barəsində də fərdi profilaktik iş aparılır.

Əsasnamə layihəsinə görə, yetkinlik yaşına çatmayanların təlim-tərbiyəsi və saxlanılması sahəsində öz vəzifələrini üzrlü səbəblərdən icra etməyən, yaxud onların davranışına mənfi təsri göstərən valideynlər və ya digər qanuni nümayəndələr barəsində intizam təsir tədbirləri tətbiq edilir.

A.Naxçıvanlı hesab edir ki, bu dəyişikliklər valideynlərin məsuliyyətini daha da artıracaq.

Layihələrin Milli Məclisin plenar iclasına müzakirə üçün təqdim edilməsi qərara alınıb.

Məqalədə:
Xəbər lenti

Xəbər lenti