Bakı. Trend:
Qobustan qəsəbəsinin sosial-iqtisadi inkişafının yekunlarına həsr edilmiş hesabat yığıncağı keçirilib.
Qaradağ Rayon İcra Hakimiyyətindən (RİH) Trend-ə verilən məlumata görə, hesabat yığıncağında Qaradağ RİH başçısı Süleyman Mikayılov, müavinləri, rayonun hüquq-mühafizə orqanlarının rəhbərləri, rayon İcra hakimiyyətinin məsul işçiləri, rayon təsərrüfat sahələrinin rəhbərləri iştirak ediblər.
Qaradağ RİH başçısının Qobustan qəsəbəsi üzrə nümayəndəsinin müavini Osman Quliyev hesabat verərək qeyd edib ki, 2018-ci il Qobustan qəsəbəsi üçün olduqca uğurlu bir il olub. Belə ki, Qaradağ rayonunda həyata keçirilən quruculuq və abadlıq işləri rayon əhalisi kimi sakinləri tərəfindən də böyük rəğbətlə qarşılanıb.
Ölkə başçısının müvafiq sərəncamına uyğun olaraq Qobustan qəsəbəsində 17 saylı BŞX-nın binası yenidən inşa edilib. Müasir dövrün tələblərinə cavab verən möhtəşəm xəstəxana binasının açılışında İlham Əliyev və birinci xanım Mehriban Əliyeva iştirak ediblər. Təbii ki, görülmüş işlər göz qabağındadır və bütün bunlar qəsəbə sakinlərini ürəkdən sevindirir. Ötən il ərzində qəsəbə ərazisində əhalinin elektrik, su və qaz təchizatında heç bir problem olmayıb. Qəsəbə sakinlərini narahat edən problemlər də Qobustan qəsəbə nümayəndəliyində araşdırılıb, məsələnin həli üçün lazımi tədbirlər görülüb.
S.Mikayılov qəsəbə sakinlərindən 9 nəfəri fərdi qaydada dinləyib. Çıxış edən qəsəbə sakinləri ölkə başçısına öz dərin təşəkkürlərini bildiriblər. Sakinləri narahat edən problemləri dinlənildikdən sonra onların həlli istiqamətində aidiyyəti üzrə rayonun idarə rəhbərlərinə müvafiq tapşırıqlar verilib.
Hesabat yığıncağında qəsəbə sakinləri nümayəndəliyin 2018-ci ildə gördüyü işlərə qənaətbəxş qiymət verilib.
