...

Füzuli, İmişli, Ağcabədi və Goranboy rayon sakinlərinin su təminatı ilə bağlı problemləri həll olunur

Cəmiyyət Materials 4 İyul 2020 21:23 (UTC +04:00)
Füzuli, İmişli, Ağcabədi və Goranboy rayon sakinlərinin su təminatı ilə bağlı problemləri həll olunur

Bakı. Trend:

Füzuli rayonun Alxanlı kənd sakini Kamal Quliyevin transformator yarımstansiyasının olmaması səbəbindən kənd ərazisində mövcud olan istismarı dayandırmış subartezian quyusuna yeni transformatorun quraşdırılması və enerji şəbəkəsinə qoşulması barədə müraciəti araşdırılıb və əvvəllər mövcud olmuş transformator yarımstansiyasının “Azərişıq” ASC-nin yerli qurumunun balansında olduğu müəyyən edilib.

“Meliorasiya və Su Təsərrüfatı” ASC-dən Trend-ə bildirilib ki, qurum tərəfindən “Azərişıq” ASC ilə aparılmış danışıqların nəticəsi olaraq, həmin quyu üçün transformator yarımstansiyası ayrılıb və hazırda quraşdırma işləri aparılır. Quyunun işə salınması nəzərdə tutulub.

İmişli rayonunun Xoşçobanlı kəndinin bir qrup sakinlərinin su təminatı ilə bağlı müraciətləri ilə əlaqədar olaraq bildirilib ki, kəndin 820 ha torpaq sahələri başlanğıcını Cənubi Muğan kanalından götürən Qızıl arx kanalı vasitəsilə suvarma suyu ilə təmin edilir. Həmin kanal rayonun 24 kəndinin 10 min 800 ha sahəsinə xidmət edir. Hazırda kanala saniyədə 5 kubmetr su verilir və həmin su limit əsasında proporsional olaraq kəndlər arasında bölünür. Xoşçobanlı kəndinə limitə uyğun su verilir və su təminatında çətinlik yoxdur.

Ağcabədi rayonun Afşar və Qaradolaq kəndlərinin sakinləri tərəfindən daxil olan müraciətlər araşdırılıb. Bildirilib ki, bu kəndlərin əkin sahələrinin su təminatı əsasən başlanğıcını Araz çayından götürən Yeni Xanqızı kanalı vasitəsilə həyata keçirilir. Bu kanal vasitəsilə rayonun 8 kəndinin 14 min ha yaxın, o cümlədən Afşar kəndinin 2 min 100 ha və Qaradolaq kəndinin 2 min 283 ha sahələri su ilə təmin edilir. Hazırda kanal vasitəsilə rayona saniyədə 2 kubmetr su verilir və su bölgüsü qrafiki əsasında kəndlər arasında paylanılır. Suyun miqdarı az olduğundan suvarmada gecikmələr yaranır. Su təminatına köməklik göstərilməsi məqsədi ilə cəmiyyətin nümayəndəsi rayona ezam edilib. Hazırda Araz çayında su sərfi müəyyən qədər artdığından Yeni Xanqızı kanalı vasitəsilə Ağcabədi rayonuna verilən suyun miqdarının saniyədə 3 kubmetr çatdırılması üçün tədbirlər görülür. Suyun verilməsi təmin ediləcək.

Goranboy rayonun Kələk kənd sakinləri Nəbi İbrahimov, Yaqub Əliyev və Qaramusanlı kənd sakini Şəmsəddin Mirzəyevin müraciətləri barədə bildirilib ki, rayonun Kələk kəndi ərazisində cəmiyyətin yerli istismar idarəsinin balansında 13 ədəd subartezian quyusu var və bu quyular hazırda işlək vəziyyətdədir. Lakin quyulardan 2 ədədi uzun müddət istismarda olduğundan məhsuldarlıqları xeyli azalıb və tələbatı tam ödəmir. Rayonun Qaramusalı kəndində istismarda olan 25 ədəd quyu işlək vəziyyətdədir. Onlardan 3 ədədinin məhsuldarlığı azalıb. Sakinlər həmin quyuların ətrafında yeni quyu lüləsinin (kolunun) qazılmasını xahiş ediblər. Qeyd edilib ki, cari ildən rayon ərazisində məhsuldarlığı azalmış quyulardan 10 ədədinin, o cümlədən Kələk kəndində 1 ədəd və Qaramusalı kəndində 1 ədədinin yanında yeni quyu lüləsinin (kolunun) qazılması nəzərdə tutulub, bu quyulardan 2-də qazma işləri başa çatdırılıb və ilin sonunadək digər quyularının qazılması təmin ediləcək.

Məqalədə:
Xəbər lenti

Xəbər lenti