...

ANAMA və ADRA əhalinin maarifləndirilməsi işində yeni əməkdaşlığa start verir (FOTO)

Cəmiyyət Materials 26 İyun 2022 11:08 (UTC +04:00)
ANAMA və ADRA əhalinin maarifləndirilməsi işində yeni əməkdaşlığa start verir (FOTO)

Bakı. Trend:

İşğaldan azad edilmiş ərazilərdə müharibə qalıqları və müxtəlif növ partlayıcı qurğularla bağlı bədbəxt hadisələrin qarşısının alınması məqsədilə əhalinin maarifləndirilməsi istiqamətində fəaliyyət davam edir. İnsanların mina və partlamamış silah-sursatların qurbanlarına çevrilməməsi məqsədilə, bu istiqamətdə fəaliyyət genişləndirilir. “Böyük qayıdış” proqramı çərçivəsində ilk sakinlərin yaşayış məntəqələrinə yerləşdirilməsi üzrə başlanan işlər bu fəaliyyəti daha da zəruri edir. Beləliklə, maarifləndirmə işində məlumatların əhaliyə hərtərəfli, dolğun çatdırılması məqsədi ilə bu prosesə bütün kommunikasiya vasitələrinin cəlb edilməsi vacib məsələlərdən birinə çevrilmişdir.

ANAMA-dan Trend-ə verilən məlumata görə, Bu mövzuda sosial xarakterli reklamların açıq məkanda yayımının həyata keçirilməsi məqsədilə Azərbaycan Respublikasının Minatəmizləmə Agentliyi (ANAMA) və Azərbaycan Respublikasının Dövlət Reklam Agentliyi (ADRA) arasında Memorandum imzalanıb. Memorandumun məqsədi vizual kommunikasiya vasitələri hesabına partlayıcı qurğuların təhlükəsi ilə bağlı insanların maarifləndirilməsi işini təkmilləşdirmək, mina xəbərdaredici işarələr barədə məlumatlandırmağa davam etmək, habelə, insanların şüurunda nizam-intizam və özünə məsuliyyət barədə fikir formalaşdırmaqdır.

İmzalanma mərasimində çıxış edən Azərbaycan Respublikasının Minatəmizləmə Agentliyinin sədri Vüqar Süleymanov bildirib ki, mina və müharibənin partlayıcı qalıqları problemi istər, işğaldan azad edilmiş ərazilərdə infrastrukturun bərpasına cəlb olunan işçilərin, istərsə də müharibəyə məruz qalmış rayonların, həmçinin keçmiş təmas xətti boyu ərazilərin sakinlərinin həyat və fəaliyyətinə təhlükə mənbəyidir. Qeyd olunub ki, 2020-ci ilin 10 noyabr tarixindən cari ilin 23 iyun tarixinədək mina partlayışları nəticəsində 225 nəfər minaların qurbanı olub, onlardan 186 nəfər xəsarət alıb, 39 nəfər həlak olub.

ADRA-nın İdarə Heyətinin sədri Aydın İbadov isə qeyd edib ki, işğaldan azad edilən ərazilərdə insanları ehtiyatlı davranmağa səsləyəcək sosial xarakterli reklamlar təkcə bölgələrdə deyil, eləcə də respublikamızın müxtəlif ərazilərində yayımlanacaq. O bildirib ki, “mina terroru” ilə mübarizəyə dəstək vermək hər bir vətəndaşın borcudur. Buna görə də soydaşlarımızın minalanmış ərazilərdə qoyulmuş qaydalara ciddi əməl etməsi mütləqdir.

İki qurum arasında təməli qoyulan əməkdaşlıq əhalinin təhlükə barədə məlumatlı olmasına və təhlükəsiz şəraitdə işğaldan azad edilmiş ərazilərdə yaşaması üçün öz töhfəsini verəcəkdir.

Məqalədə:
Xəbər lenti

Xəbər lenti