Ağdam. Trend:
119 saylı Ağdam seçki dairəsində 39 məntəqə bələdiyyə seçkilərinə qoşulub.
119 saylı Ağdam Seçki Dairəsinin Dairə Seçki Komisiyasının sədri Sahil Əliyev Trend-in yerli müxbirinə açıqlamasında bildirib ki, 8 bələdiyyə üzrə 84 yer uğrunda 170 nəfər namizəd mübarizə aparır.
544 müşahidəçi isə seçkilərin gedişatını izləmək üçün məntəqələrdə iştirak edir. Seçki məntəqələrinin 4-də seçkinin gedişatını internet üzərindən izləmək üçün kameralar quraşdırılıb. 38 085 seçici öz hüququndan istifadə edir. Səhər saatlarından məntəqəyə üz tutan seçicilər öz konstitusion hüquqlarından istifadə edirlər.
Seçki hüququndan istifadə edən seçicilər və müşahidəçilər seçkilərin demokratik şəkildə keçirildiyini və heç bir qanun pozuntusuna rast gəlmədiklərini deyirlər.
Hazırda seçki prosesi davam edir.
Qeyd edək ki, bu gün Azərbaycan bələdiyyə seçkiləri keçirilir. Seçki məntəqələri səhər saat 08:00-da açılıb.
Bələdiyyə seçkilərində 118 seçki dairəsində 685 bələdiyyəyə 8 071 üzv seçiləcək. 16 092 namizədin adı seçki bülletenlərinə daxil edilib. Səs vermək hüququna malik 5 961 987 seçicinin adı siyahıya daxil edilib. Bələdiyyə seçkilərində MSK və dairə seçki komissiyalarında 70 625 müşahidəçi akkreditasiyadan keçib. 1000 seçki məntəqəsində veb-kameralar quraşdırılıb.
Səsvermə prosesi saat 19:00-dək davam edəcək.
