Bakı. Trend:
"Referans Medical Group" və "PAŞA Həyat Sığorta" arasında
memorandum imzalandı. Qonaqlara "TezSağal" məhsulu təqdim edildi.
Layihə ilkin mərhələdə "Referans Medical Group"un tərkibinə daxil
olan "LOR Hospital"da tətbiq olunur. Daha sonra "Referans Medical
Group"a daxil olan digər hospitallara da tətbiq ediləcək.
Layihə çərçivəsində "LOR Hospital" və "PAŞA Həyat Sığorta" arasında
əməkdaşlıq müqaviləsi imzalanıb. Müqavilə "TezSağal" əməliyyat
həyat sığortası məhsulunun "LOR Hospital"da tətbiqini və
pasiyentlər üçün sığorta imkanlarının genişləndirilməsini nəzərdə
tutur.
"TezSağal" eksklüziv xarakter daşıyır:
"PAŞA Həyat Sığorta" LOR profili üzrə sığorta
xidmətlərini "LOR Hospital"dan başqa heç bir klinikada aktivləşdirə
bilməz — bu xidmət regionda yalnız "LOR Hospital" ilə həyata
keçiriləcək.
"TezSağal" məhsulu pasiyentlərə bir sıra üstünlüklər təqdim
edir:
- Əməliyyat keçirən pasiyentlər üçün 30 günlük həyat sığortası, pasiyenti əməliyyatdan sonrakı kritik dövrdə maliyyə risklərinə qarşı qoruyur.
- Məhsul heç bir əlavə ödəniş tələb olunmadan 18–55 yaş arası pasiyentlərə tətbiq olunur.
- Sığorta təminatı təkcə əməliyyatla bağlı riskləri deyil, pasiyentin daşıdığı digər xəstəliklərdən yarana biləcək əlavə riskləri də əhatə edir.
Məhsulun ikinci mərhələsində əməliyyat sonrası ağırlaşmalar da
sığortalanacaq. Bu, pasiyentin daşıdığı digər xəstəliklərdən
yaranan ağırlaşmaların da yenidən sığorta hesabına əməliyyat
olunması deməkdir. Eyni zamanda bu mərhələdə sığorta təminatı 18
yaşına qədər olan pasiyentləri də əhatə edəcək.
LOR profili üzrə eksklüziv əməkdaşlığın seçilməsində əsas məqsəd
budur ki, "LOR Hospital" Azərbaycanın ilk və yeganə ixtisaslaşmış
Qulaq, Burun, Boğaz və Baş-Boyun Mərkəzi olaraq, yaradıldığı gündən
etibarən xəstələrin sağlamlığını qorumaq, diaqnostika və müalicə
proseslərini beynəlxalq standartlara uyğun səviyyədə həyata keçirən
klinikadır. Sığorta təminatı təkcə Azərbaycan vətəndaşlarını deyil,
xarici vətəndaşları da əhatə edir ki, bu da regionda tibbi turizmin
təşviqinə töhfə verir.
"LOR Hospital"da həyata keçirilməklə start alan layihənin növbəti
mərhələlərdə "Referans Medical Group"un digər tibb müəssisələrini
də əhatə etməsi planlaşdırılır.
Əməkdaşlığın əsas məqsədi — məhsulu təqdim edərkən pasiyent
məmnuniyyətini təmin etməklə yanaşı, pasiyentlərin daşıdıqları
digər xəstəliklərdən yarana biləcək hər hansı riski də sığorta
təminatına daxil etməkdir. Bu əhatə "PAŞA Həyat Sığorta" ilə
əməkdaşlıq çərçivəsində artıq pasiyentlərə təqdim olunur.
Beləliklə, pasiyentlər tibbi xidmətlə yanaşı, əməliyyatdan
sonrakı dövr üçün əlavə maliyyə müdafiəsi əldə edir və bütün
hallarda sığortalı olduqlarına əmin şəkildə güvənə bilirlər.
Tədbirdə "PAŞA Həyat Sığorta" və "Referans Medical Group"un rəhbər
heyəti və hər iki şirkətin nümayəndələri iştirak ediblər. Çıxışlar
zamanı əməkdaşlığın əhəmiyyəti, "TezSağal" layihəsinin pasiyentlər
üçün yaradacağı üstünlüklər və gələcək inkişaf perspektivləri
vurğulanıb.
