Noyabrın 23-də Ağır Cinayətlərə Dair İşlər üzrə Azərbaycan Məhkəməsində dövlət ittihamçısı Çingiz Şükürov "Barmek-Azərbaycan" Şirkətinin yüksək vəzifəli 6 əməkdaşına cəza tələb edib. Trend xəbər verir ki, məhkəmə iclası hakim Azər Orucovun sədrliyi ilə keçirilir.
Prokuror çıxışında məhkəmənin nəzərinə çatdırıb ki, 2006-cı ilin mart ayında Baş Mütəşəkkil Cinayətkarlığa Qarşı Mübarizə İdarəsi tərəfindən həbs olunan şirkətin baş mühəndisi Asif Əkbərov, sayğac quraşdırma və nəzarət idarəsinin rəisi Firudin Ağayev, onun müavini Elnur Mütəllibov, enerji alışı idarəsinin rəisi Ələsgər Ramazanov, onun müavini Rahib Musayev və Binəqədi rayonunun enerji satışı üzrə aparıcı mühəndisi Əhliman Mahmudov dövlət əmlakını mənimsəməkdə və vəzifə səhlənkarlıqlarında təqsirli biliniblər.
Məhkəmə yolu ilə müəyyən edilib ki, "Azərenerji" ilə "Barmek" arasında bağlanan müqaviləyə əsasən hesablayıcı sayğaclar düzgün işləməyib, müdafiə etdiyi şəxsin və digərlərinin səhlənkarlığı üzündən "Azərenerji"yə külli miqdarda ziyan dəyib. Lakin prokuror həmçinin qeyd edib ki, təqsirləndirilən şəxslərə qarşı irəli sürülən ittihamların bəzisi məhkəmədə təsdiqini tapmayıb, bəzisi isə tam sübuta yetirilib. Bu səbəbdən də o, məhkəmədən sübuta yetirilməyən maddələrə xitam verilməsini xahiş edib.
Prokuror məhkəmədən Asif Əkbərova cəzasını məntəqə tipli cəzaçəkmə müəssisəsində çəkməklə 3 il, Firudin Ağayevə cəzasını məntəqə tipli cəzaçəkmə müəssisəsində çəkməklə 4 il, Elnur Mütəllibova cəzasını məntəqə tipli cəzaçəkmə müəssisəsində çəkməklə 4 il, Əhliman Mahmudova cəzasını məntəqə tipli cəzaçəkmə müəssisəsində çəkməklə 3 il, Ələsgər Ramazanova cəzasını ümumi rejimli cəzaçəkmə müəssisəsində çəkməklə 5 il, Rahib Musayevə isə cəzasını ümumi rejimli cəzaçəkmə müəssisəsində çəkməklə 4 il müddətinə azadlıqdan məhrumetmə cəzası tələb edib.
Məhkəmə iclası dekabrın 1-də vəkillərin çıxışları ilə davam edəcək.