Azərbaycan, Bakı/müxbir Trend K. Zərbalıyeva/Ali Məhkəmədə Cinayət Məcəlləsində islahatların aparılması ilə əlaqədar ekspertlərin iclası keçirilib. Ali Məhkəmədən cümə günü Trend ə verilən məlumata görə, məhkəmə-hüquq sahəsində aparılan islahatların tərkib hissəsi olaraq Cinayət Məcəlləsində islahatların aparılması üçün 2006-cı ilin iyunundan Ramiz Rzayevin sədrliyi ilə Prezident Aparatının, Ədliyyə, Daxili İşlər və Milli Təhlükəsizlik Nazirliklərinin, Respublika Prokurorluğunun, Ali Məhkəmənin, vəkillərin və Bakı Dövlət Universitetinin nümayəndələrindən ibarət işçi qrupu fəaliyyət göstərir. İşçi qrupu Cinayət Məcəlləsi üzrə ekspertlərin şərhlərini öyrənib və Cinayət Məcəlləsini təkmilləşdirmək məqsədilə tövsiyyələr hazırlayıb.
İclasda Avropa Şurası Baş katibinin Azərbaycanda xüsusi nümayəndəsi Denis Bribosia çıxış edib, işçi qrupunun nümayəndələri tərəfindən təklif edilmiş dəyişikliklərə münasibətini bildirib.
Ekspertlər tərəfindən Cinayət Məcəlləsinin bir sıra maddələri müzakirə edilərək həmin maddələrə müvafiq dəyişikliklər və əlavələr olunub.
Cinayət Məcəlləsinə edilmiş bu dəyişikliklər Azərbaycan Respublikasının Beynəlxalq Konvensiyalara tərəfdar olmaqla götürdüyü öhdəliklərin yerinə yetirilməsindən irəli gəlib. Dəyişikliklər edillən zaman "İnsan hüquqlarının və əsas azadlıqlarının müdafiəsi haqqında" Konvensiyanın, "Uşaq hüquqları haqqında" Konvensiyanın və digər Beynəlxalq Konvensiyaların müddəaları nəzərə alınıb.