Azərbaycan, Gəncə / Trend müxbir V.Məmmədov/ Gəncədə yay mövsümünə hazırlıqla bağlı Yanğın Təhlükəsizliyi Xidməti işçilərinin zona müşavirəsi keçirilib. Müşavirədə Ekologiya və Təbii Sərvətlər, Kənd Təsərrüfatı nazirliklərinin, Azad Sahibkarlar Konfederasiyasının, Meşə Təsərrüfatı Departamentinin nümayəndələri, eləcə də yanğından mühafizə strukturlarının əməkdaşları iştirak edib. Fövqəladə Hallar Nazirliyinin Dövlət Yanğına Nəzarət Xidmətinin şöbə rəisinin əvəzi Cəlil Quliyev bildirib ki, zona müşavirəsinin əsas məqsədi yaz mövsümünün gəlişi ilə müxtəlif bitkilərin yığılması zamanı və isti havalarda meşələrdə mümkün yanğınların qarşısının alınmasıdır.
Əsasən yanğınların Bərdə, Ağcabədi, Şəmkir, Zərdab və digər kənd təsərrüfatı rayonlarında qeydə alındığını deyən Quliyev ötən ildə 96 yanğın hadisəsi nəticəsində fermerlərə 14 min 300 manat dəyərində ziyan dəydiyini bildirib. Meşə sahələrinə dəyən ziyanın həcmi ötən il 2005-ci ilə nisbətən 30% artıb.
Azərbaycanın Gəncə şəhəri paytaxt Bakıdan 360 kilometr qərbdə yerləşir. Azərbaycanın ikinci ən böyük sənaye şəhəri sayılır. Əhalisi 400 minə yaxındır.
