Azərbaycan, Bakı / Trend müxbir K Zərbalıyeva / Ağır Cinayətlərə Dair İşlər üzrə Məhkəmədə hakim İmaməli Əsgərovun sədrliyi ilə Gəncə şəhər Yol Polisi Şöbəsinin rəisi İkram Xəlilovun ölümündə təqsirləndirilən Zabit Kazımov və Pərviz Məmmədovun məhkəmə prosesi davam etdirilib. Məhkəmədən çərşənbə axşamı verilən məlumata görə, prosesdə Xəlilovun ölümünün səbəbinin müəyyənləşdirilməsi məqsədi ilə təyin olunmuş məhkəmə-tibb ekspertizasının rəyi elan olunub. Ekspertiza Xəlilovun Kazımovun vurduğu zərbədən ölmədiyi barədə rəy verib. Zərərçəkmişin nümayəndəsi ekspertizanın rəyi ilə razılaşmayıb və işin yenidən ekspertizaya göndərilməsi barədə vəsatət verib. Məhkəmə vəsatəti təmin edərək işi yenidən ekspertizaya göndərib. Bu səbəbdən də proses qeyri-müəyyən vaxtadək təxirə salınıb.
Ötən il sentyabrın 21-dən 22-nə keçən gecə Kazımovla Xəlilov arasında insident yaranıb. Xəlilov yol hərəkəti qaydalarını pozan sürücü Kazımovu saxlayıb. Bu zaman yol polisinin rəisi ilə vətəndaş arasında mübahisə düşüb. Mübahisə zəminində Kazımov yol polisinin rəisi Xəlilovu yumruğu ilə vurub. Huşunu itirən yol polisinin rəisi yerə yıxılaraq başı betona dəyib. O, Gəncə şəhər 2 saylı Təcili Tibbi Yardım Xəstəxanasına çatdırılsa da, həyatını xilas etmək mümkün olmayıb. Təqsirləndirilənin yaxınları hadisə baş verərkən Xəlilovun sərxoş olduğunu və Kazımovun onu itələməsi ilə müvazinətini saxlaya bilməyib yıxıldığını iddia edir.
Kazımov barəsində Cinayət Məcəlləsinin 120.2.3-cü (qəsdən adam öldürmə) və 221-ci (xuliqanlıq), Məmmədov barəsində isə 221-ci maddə ilə cinayət işi açılıb.
