Bakı. Trend:
Bu gün UEFA Avropa Liqasının II təsnifat mərhələsinin ilk oyunları keçirilib.
Trend-in məlumatına görə, “Qəbələ” Macarıstanda “MTK Budapeşt” klubunun qonağı olub.
Yerli komandanın hücumları ilə başlayan matçın 15-ci dəqiqəsində “Qəbələ”nin qapıçısı Dimitri Bezotosnıy rəqibin penalti zərbəsini dəf edib. Əvəzində 25-ci dəqiqədə Nika Kvekveskiri macarları məyus edib.
İkinci hissədə də təmsilçimiz rəqib qapısına yol tapıb – 63-cü dəqiqədə Filip Ozobiçin qapının sağ küncünə zərbəsi dəqiq alınıb. 7 dəqiqə sonra hesab arasındakı fərq minimuma enib – 1:2.
Bu, oyunda sonuncu qol olub. Beləliklə, “Qəbələ” səfərdə tarixi qələbə qazanıb.
Cavab görüşü iyulun 21-də keçiriləcək.
Qeyd edək ki, digər təmsilçilərimizdən "Neftçi" Bakıda Makedoniyanın "Şkendiya" klubu ilə qolsuz bərabərə qalıb. "Kəpəz" isə səfərdə Avstriyanın "Admira" komandasına minimal hesabla məğlub olub.