Paris. Trend:
Paris-2024 Yay Olimpiya Oyunlarının bədii gimnastika yarışlarına yekun vurulub.
Trend xəbər verir ki, qrup hərəkətləri üzrə milli komandamız final mərhələsində mübarizə aparıblar.
İştirakçılar öncə 5 halqa, ardınca 3 lent və 3 topla çıxış ediblər. Zeynəb Hümmətova, Ləman Əlimuradova, Darya Sorokina, Güllü Ağalarzadə və Yelizaveta Luzandan ibarət Azərbaycan millisi yekunda 66,450 xal toplayıb.
Millimiz ilk hərəkətdə 34,850, ikincidə 31,600 xal yığıb. Komandamız bu göstərici ilə 5-ci yeri tutub.
Çin komandası 1 -ci yerə sahib olub. İsrail komandası 2-ci , İtaliya isə 3 -cu yerdə qərarlaşıb.
xxx
17:17
Paris-2024 Yay Olimpiya Oyunlarının bədii gimnastika yarışlarında son medal dəsti uğrunda mübarizə davam edir.
Trend İdman.biz-ə istinadən xəbər verir ki, qrup hərəkətləri üzrə komandalar final mərhələsində ikinci hərəkətdə çıxışlara start veriblər.
Yığmalar üç lent və topla bacarıqlarını göstərirlər. Zeynəb Hümmətova, Ləman Əlimuradova, Darya Sorokina, Güllü Ağalarzadə və Yelizaveta Luzandan ibarət Azərbaycan millisi xalçaya 2-ci çıxıb.
Yığmamızın çıxışı 31,600 xalla qiymətləndirilib. Millimiz iki hərəkətin cəmində 66,450 xala malikdir. Olimpiadada çıxışını başa vuran komandamızın yekun mövqeyi digər iştirakçıların nəticələrindən sonra bəlli olacaq.
Qeyd edək ki, yığmamız ilk hərəkətdən sonra 34,850 xalla 6-cı yerdə qərarlaşıb.
xxx
16:24
Paris-2024 Yay Olimpiya Oyunlarının bədii gimnastika yarışlarında son medal dəsti uğrunda mübarizə başlayıb.
Trend xəbər verir ki, qrup hərəkətləri üzrə komandalar final mərhələsinə start veriblər.
İlk çıxışda yığmalar 5 halqa ilə bacarığını göstərir. Zeynəb Hümmətova, Ləman Əlimuradova, Darya Sorokina, Güllü Ağalarzadə və Yelizaveta Luzandan ibarət Azərbaycan millisi xalçaya 2-ci çıxıb.
Yığmamızın çıxışı 34,850 xalla qiymətləndirilib. Millimiz iki komanda arasında 2-cidir. Mükafatlar uğrunda 8 komanda mübarizə aparır.
Qeyd edək ki, yığmamız təsnifat mərhələsində 8-ci olub.
