Bakı. Trend:
Asiya İnkişaf Bankı (AİB) Azərbaycanın 2024-cü il üçün ÜDM artım tempinin proqnozunu aprel hesabatındakı 1,2 faizdən sentyabr hesabatında 2,7 faizə qədər artırıb.
Trend bu barədə AİB-ə istinadən xəbər verir.
AİB, 2025-ci il üçün proqnozu aprel hesabatındakı 1,6 faizdən sentyabr hesabatında 2,6 faizə yüksəldib.
Hesabatda qeyd olunur ki, Cənubi Qafqaz iqtisadiyyatlarında 2024-cü ilin birinci yarısında artım tempi 2024-cü ilin aprelinə proqnozlaşdırılandan daha yüksək olub.
“Azərbaycanda artım 4,3 faizə çatıb, bu da qeyri hidrokarbon sektorunun genişlənməsi sayəsində mümkün olub. Dövlət xərclərinin artması və sərmayələrin əhəmiyyətli dərəcədə yüksəlməsi bu prosesə dəstək olub”, - AİB vurğulayıb.
Qeyd edək ki, Azərbaycanın Dövlət Statistika Komitəsinin məlumatlarına görə, 2024-cü ilin yanvar-avqust aylarında ölkənin ÜDM-i 2023-cü ilin eyni dövrü ilə müqayisədə 4,3 faiz artaraq 80,96 milyard manat olub.
Hesabat dövründə 2024-cü il üçün qeyri-neft sektorunda əlavə dəyər 7 faiz, neft-qaz sektorunda isə 2023-cü ilin eyni dövrü ilə müqayisədə 0,2 faiz artıb.
ÜDM strukturu üzrə bu dövrdə sənayenin payı 37,9 faiz təşkil edib.
Dövlət Statistika Komitəsinin məlumatlarına əsasən, ÜDM-in 9,7 faizi ticarət və nəqliyyat vasitələrinin təmiri, 7 faizi nəqliyyat və anbar təsərrüfatı, 6,1 faizi tikinti, 6 faizi kənd, meşə təsərrüfatı və balıqçılıq, 2,5 faizi turizm sektoru, 1,8 faizi informasiya və kommunikasiya sahəsinə düşüb. 18,9 faiz isə digər iqtisadi sektorların payına düşür.
İxrac vergisi üzrə xalis gəlirlər bu dövrdə ÜDM-in 10,1 faizini təşkil edib.
2024-cü il ərzində Azərbaycanda əhalinin hər nəfərinə düşən ÜDM-in dəyəri 7 941,3 manat olub.