Bakı. Trend:
Asiya İnkişaf Bankı (AİB) Bakı–Böyük Kəsik dəmir yolu sahəsində elektrikləşdirmə, siqnalizasiya və telekommunikasiya sistemlərinin modernləşdirilməsi layihəsini nəzərdən keçirir.
Bu barədə Trend AİB-ə istinadən məlumat verir.
“Sözügedən dəmir yolu sahəsi Azərbaycanın şərq-qərb dəmir yolu dəhlizinin əsas hissəsidir və “Azərbaycan Dəmir Yolları”nın əsas ixrac-idxal və tranzit əməliyyatlarına xidmət göstərir.
Layihə elektrik təchizatı üzrə müasir infrastrukturun – dayaqların, kontakt şəbəkəsinin, yarımstansiyaların və kabel xətlərinin alınması və quraşdırılmasını, həmçinin stansiyalardakı avadanlıqlar, bort elektron qurğuları, fiber-optik və simsiz rabitə həlləri daxil olmaqla yeni siqnalizasiya və rabitə sistemlərinin tətbiqini nəzərdə tutur”, – məlumatda bildirilir.
Qeyd olunur ki, təşəbbüs ölkənin şərq-qərb və şimal-cənub dəhlizlərində dəmir yolu daşımalarının enerji səmərəliliyinin və təhlükəsizliyinin artırılmasına yönəlib.
AİB-in açıqlamasına görə, layihənin əsas gözlənilən nəticəsi xəttin müasir elektrikləşdirmə, siqnalizasiya və telekommunikasiya sistemləri ilə tam şəkildə təchiz olunmasıdır ki, bu da Azərbaycanın regional nəqliyyat marşrutlarının mühüm halqası kimi mövqeyini daha da gücləndirəcək.
Ümumilikdə 300 milyon dollar dəyərində olan layihə Asiya İnkişaf Bankı (AİB), Asiya İnfrastruktur İnvestisiya Bankı (AIIB) və Azərbaycan hökuməti tərəfindən birgə maliyyələşdiriləcək və layihənin gerçəkləşdirilməsində AİB aparıcı agentlik kimi çıxış edəcək.