Bakı. Trend:
Nijnekamsk şəhərinin meri Radmir Belyayev “Nijnekamskneftxim” ( SİBUR” şirkətinə daxildir) neft-kimya zavodunda baş vermiş qəza və insanların həlak olması ilə əlaqədar Nijnekamskda üç günlük matəm elan edib.
Trend bu barədə Rusiya KİV-ə istinadən xəbər verir.
Hadisə ilə əlaqədar bütün əyləncə və kütləvi tədbirlər ləğv olunub. Müəssisə binalarında dövlət bayraqları yarıya endiriləcək.
Xatırladaq ki, martın 31-də “Nijnekamskneftxim” neft-kimya zavodunda partlayış, ardınca isə güclü yanğın baş verib. Üç nəfər, o cümlədən bir yanğınsöndürən həlak olub, 72 nəfər xəsarət alıb, onlardan 21-i xəstəxanaya yerləşdirilib.
""Nijnekamskneftxim"in sintetik kauçuk istehsalı müəssisəsində avadanlığın hermetikliyinin pozulmasının nəticələrinin aradan qaldırılması işləri zamanı hələlik müəyyən edilməmiş mənbədən qaz qarışığının alovlanması və bunun ardınca partlayış baş verib", – deyə şirkət bildirib.
Hadisə ilə əlaqədar Rusiya Cinayət Məcəlləsinin 217-ci maddəsi (təhlükəli istehsalat obyektlərində sənaye təhlükəsizliyi tələblərinin pozulması) üzrə istintaq başlanılıb.