Azərbaycan, Bakı/ Trend , müxbir S.Babayeva/ BMT Ərzaq və Kənd Təsərrüfatı Təşkilatının (FAO) baş baytarı Jozef Domeneç hesab edir ki, Qafqaz regionunda donuzlar arasında "Afrika taunu" xəstəliyinin yayılması heyvanların sağlamlığı üçün ciddi riskdir və bütün regionda faciəli şəkil ala bilər.
Onun sözlərinə görə, bu problemə qəti şəkildə yanaşmanın mövcud olmaması bu xəstəliyin Qafqazda epidemiya halına düşməsi və digər regionlara yayılmasına səbəb ola bilər.
"Avropa İttifaqı, Rusiya, Ukrayna və digər ölkələr böyük problem astanasındadırlar və bu barədə düşünməlidirlər",-deyə Domeneş hesab edir.
FAO-da hesab edirlər ki, Gürcüstanda donuzlar arasında aşkar olunmuş "Afrika taunu" virusu artıq Ermənistanın şimalında və paytaxt İrəvan ətrafında yayılıb. Virus Qafqaz regionunda ilk dəfə bu ilin iyun ayının əvvəlində qeydə alınıb. Qısa zamanda xəstəlik ölkənin 62 vilayətindən 52-də yayılıb.
Vəziyyətin gərginləşməsini nəzərə alaraq, FAO nəzarətin həyata keçirilməsi üçün Ermənistan və Gürcüstana texniki yardım göstərmək və bu ölkələrin hökumətlərinə xəstəliklə mübarizədə milli strategiyanın həyata keçirilməsində yardım etməyi planlaşdırır. FAO, həmçinin, terninqlər keçirilməsi və avadanlıqla təmin etməklə, baytarlıq xidmətlərini gücləndirmək niyyətindədir.
Azərbaycan Kənd Təsərrüfatı Nazirliyi yanında Dövlət Baytarlıq Xidmətinin mətbuat katibi Yolçu Xanvəli bildirib ki, iyun ayında Gürcüstanda xəstəlik aşkar olunandan sonra, Gürcüstandan donuz gətirilməsinə qdağa qoyulub. Ermənistanla heç bir əlaqə olmadığından, bu ölkə ilə vəziyyət neytraldır.
Xanvəlinin sözlərinə görə, Gürcüstan karantini ləğv etdikdən sonra , idxala icazə verilməsi məsələsinə baxıla bilər. Hazırda Azərbaycanın bütün sərhəd baytarlıq xidmətləri gücləndirilmiş iş rejimində fəaliyyət göstərir və bu nöqteyi- nəzərdən ölkədə vəziyyət stabildir.
