Gürcüstan, Tbilisi, / Trend müxbir N. Kirtsxaliya/ Gürcüstana Hollandiya sərmayədarlarının cəlb edilməsi məsələsi Amsterdamda Gürcüstanın XİN rəhbəri Bela Bejuaşvili və Niderlandın iqtisadi inkişaf naziri Bert Kundres arasında keçirilən görüşdə müzakirə olunub.
Gürcüstan XİN-indən verilən məlumata görə, gürcüstanlı nazir Kundersə ölkədə həyata keçirilən iqtisadi islahatlar, həmçinin, bank və vergi istiqamətində mövcud olan vəziyyət, ölkənin biznes mühitinin yaxşılaşdırılması məqsədilə Gürcüstan hökumətinin gördüyü tədbirlər barədə məlumat verib.
Tərəflər, həmçinin, iqtisadiyyat və ticarət sahələrində əməkdaşlıq məsələlərini müzakirə ediblər. Bejuaşvili və Kunders iki ölkə arasında ticarət-iqtisadi sahədə münasibətlərin inkişaf etdirilməsinin əhəmiyyətini vurğulayıblar.
Gürcüstan tərəfi hesab edir ki, Gürcüstan limanları Niderlandın özəl sektorunun marağına səbəb ola bilər, belə ki, niderlandlar limanların idarə edilməsində böyük təcrübəyə malikdirlər.
