Azərbaycan, Bakı/ " TrendCap ", müxbir Ü.İsmayılova/ Çərşənbə axşamı Azərbaycan parlamentinin iclasında "Sığorta fəaliyyəti haqqında" yeni Qanunun üçüncü oxunuşla qəbul edilməsi gözlənilir. Bu barədə Azərbaycan Maliyyə Nazirliyinin Dövlət Sığorta Nəzarəti Şöbəsinin rəhbəri Namiq Xəlilov məlumat verib. Yayda Azərbaycanın Maliyyə Nazirliyi dünya standartları əsasında hazırlanan Sığorta haqqında qanun layihəsini ölkə parlamentinə təqdim edib. Ötən həftə parlament qanun layihəsini ikinci oxunuşda təsdiqləyib, lakin müzakirələr davam etdiyindən, qanun layihəsi üçüncü oxunuşda qəbul edilməyib. Düzəlişlərə əsasən, qanun qüvvəyə mindikdən sonra, respublika ərazisində sığorta fəaliyyəti müddətsiz lisenziyalar əsasında həyata keçiriləcək. İlkin variantda bu müddət 5 il müəyyən edilib. Xarici sığorta təşkilatlarının və brokerlərinin Azərbaycanda nümayəndəliklərini açmasına qadağa qoyan maddə götürülüb. Sığorta sahəsində kadr çatışmazlığı ilə əlaqədar olaraq, professional hazırlıq tələbləri sığorta şirkətlərinin rəhbərləri ilə yanaşı, Şirkətin Direktorlar Şurasının üzvlərinə qarşı da tətbiq ediləcək.
...
