Azərbaycan, Naxçıvan,14 yanvar / Trend , müxbir E.Məmmədov/ Naxçıvan Muxtar Respublikasında (MR) 1saylı çörək zavodu fəaliyyətini hələ də bərpa etməyib. Trend in bölgə müxbirinin məlumatına görə, İrandan Muxtar Respublikaya qazın verilməsi bərpa edildikdən sonra digər çörək zavodu və çörəkbişirmə sexləri fəaliyyətini bərpa edib.
Ötən həftə İranda güclü qar yağdığından və temperatur aşağı düşdüyündən, ölkədə qaza olan təlabat artmışdı. Ona görə də İran tərəfi Naxçıvan MR-ə qazın verilməsini müvəqqəti dayandırmışdı.
Məlumata görə, təbii qaz veriləndən sonra Muxtar Respublikada çörək qıtlığı problemi aradan qalxıb. 1 saylı çörək zavodunun fəaliyyətinin dayandırılması isə, qaz problemi ilə bağlı deyil. Naxçıvan MR Kənd Təsərrüfatı Nazirliyindən zavodun bağlanması səbəbləri barədə əlavə məlumat verilmir.
Naxçıvan MR-in ərazisi 5,5 min kvadrat kilometrdir. Ölkə ərazisinin 6,4%-ni təşkil edir. 7 inzibati rayona (Babək, Şərur, Ordubad, Sədərək, Şahbuz, Culfa və Kəngərli ) bölünüb.