Azərbaycan, Bakı, 04 fevral/ Trend , müxbir İ.Xəlilova/ Asiya İnkişaf Bankı (AİB) Mərkəzi Asiyanı Azərbaycan ilə birləşdirəcək yeni nəqliyyat dəhlizlərinin yaradılması istiqamətində dərin analizlərin aparılması üçün Azərbaycana məsləhətçilər göndərəcək. Bu barədə bazar ertəsi AİB-in regional əməkdaşlıq Şöbəsinin direktoru Robert Siy məlumat verib. Bu layihələrin CAREC proqramı (CAREC-Asiya regional iqtisadi əməkdaşlığı) çərçivəsində, ötən ilin sonunda təsdiqlənən ticarət və nəqliyyatın inkişafına yardım strategiyası üzrə reallaşdırılması nəzərdə tutulub.
Bu strategiya CAREC-in səkkiz işitrakçı ölkəsindən keçən və dəyəri $18 mlrd. olan altı nəqliyyat dəhlizinin yaradılmasını nəzərdə tutur. Bu dəhlizlərdən ikisi Azərbaycanı Qazaxıstan və Türkmənistanla birləşdirəcək və avtomobil, hava, dəmir yolu əlaqəsinin inkişafını nəzərdə tutur.
"Ümumi sahillərdə limanların inkişafı vacib istiqamətlərdən ola bilər. Bunun üçün lazımi infrastuktur yaradılmalıdır", - Siy qeyd edib.
Onun sözlərinə görə, 2007-ci ildə AİB-in CAREC-də iştirak edən digər beynəlxalq maliyyə institutları ilə təsdiqlədiyi nəqliyyat dəhlizlərinin maliyyələşdirilməsinin ümumi həcmi $1,2 mlrd. təşkil edib. Onlardan $680 mln. Asiya İnkişaf Bankı tərəfindən ayrılıb.
Siy, Azərbaycan üçün AİB tərəfindən təsdiqlənmiş və nəqliyyat layihələrinin reallaşdırılmasına $500 mln. ayrımağı nəzərədə tutan MFF mexanizminin nəqliyyat dəhlizinin inkişafında bir addım olduğunu hesab edir.
CAREC səkkiz iştirakçı ölkənin (Əfqanıstan, Azərbaycan, ÇXR, Qazaxıstan, Qırğızıstan Respublikası, Monqolustan, Tacikistan və Özbəkistan) və altı təşkilatın (AİB, AYİB, BVF, İİB, BMT-nin İnkişaf Proqramı və Dünya Bankı) tərəfdaşlığıdır.