Azərbaycan, Bakı,0 6 fevral/ Trend müxbir İ.Xəlilova/Azərbaycan hökuməti ölkədə yeni sənaye şəhərciyinin tikintisi yerini konkretləşdirib. Şəhərcik Sumqayıtda yaradılacaq. Bu barədə çərşənbə günü iqtisadi inkişaf naziri Heydər Babayev məlumat verib.
Sənaye şəhərinin pilot tikinti layihəsinin əvvəlcə Xızı və Abşeronda reallaşdırılması nəzərdə tutulub. Ötən il bu ərazidə müvafiq infrastrukturun yaradılması üçün büdcə vəsaitlərindən təqribən 8 mln. manat ayrılıb. Azərbaycanda birinci sənaye şəhərciyi "Yeni Yaşma"-nın yaradılmasına dəstək layihəsi Türkiyənin Əməkdaşlıq və İnkişaf idarəsi (TİKA) tərəfindən hazırlanıb.
"Bu gün onların çoxu fəaliyyətlərini dayandırsa da, sovet vaxtından Sumqayıt sənaye müəssisələrinin təmərküzləşmə yeri olub və şəhərciyin yaradılması üçün daha məqbul yerdir", - nazir bildirib.
Onun sözlərinə görə, şəhərcik fəaliyyət göstərməyən müəssisələrin ərazisində yaradılacaq. Lakin o, bu müəssisələrin adlarını açıqlamayıb. Bu məsələ ilə əlaqədar hökumətlə razılıq var və sərəncam layihəsi hazırlanıb.
Nazirin rəyinə görə, sənaye şəhərciyinin tikinti yerinin Sumqayıta keçirilməsi, ilk növbədə, vəsaitlərə qənaət etməyə imkan verəcək, həmçinin müəssisələrin inkişafında müsbət rol oynayacaq. 2008-ci il üçün Dövlət İnvestisiya Proqramında şəhərciyin yaradılması üçün vəsaitlər ayrılıb. Onun gələcək inkişafı üçün kommersiya maliyyələşdirməsi tələb olunur və bununla əlaqədar olaraq, Beynəlxalq Maliyyə Korporasiyası və digər BMİ-ı ilə danışıqlar aparılır.
Ötən il Cənubi Koreya Azərbaycana tikinti üçün Koreya şirkətlərini cəlb etməyi tövsiyə edib. Bu , Azərbaycanın İxrac və İnvestisiyaların Təşviqi Fondu (AZPROMO) və Koreyanın KOYKO texniki yardım təşkilatının nümayəndələrinin görüşündə müzakirə predmeti olub.
Sənaye şəhərciyinin ərazisində kiçik və orta istehsalçılar fəaliyyət göstərə bilərlər. Ticarət müəssisələri istisna təşkil edir. Sənaye şəhərciyində fəaliyyət göstərən sahibkarlar üçün əsas üstünlük onların hökumət tərəfindən yaradılan infrastrukturdan istifadə edə bilmələri olacaq. Bu onların fəaliyyətinə qanunsuz müdaxilədən təminatdır. Bundan əlavə, sənaye şəhərciyi biznes-inkubator rolunu oynayacaq, inteqrasiya və işgüzar əlaqələrin qurulmasına yardım edəcək.