Azərbaycan, Bakı, 14 fevral/ Trend / Azərbaycanın Nazirlər Kabineti 2001-ci il mayın 31- də təsdiq edilən "Fiziki şəxslər tərəfindən istehsal və kommersiya məqsədləri üçün nəzərdə tutulmayan malların Azərbaycan Respublikasının gömrük sərhədindən keçirilməsi Qaydaları"-na dəyişiklik edib.
Hökumətin məlumatında deyildiyi kimi, dəyişikliklər ötən ilin sonunda kökü kəsilməkdə olan vəhşi fauna və yabanı flora növlərinin beynəlxalq ticarəti Konvensiyasının (CİTES) XIV konfransının qərarı ilə əlaqədar edilib. Qərara əsasən, Azərbaycandan gedən şəxslər özləri ilə xaricə şəxsi təlabatları üçün 125 qram qara kürü apara bilərlər. Əvvəllər bu rəqəm 250 qram olub.
Nazirlər Kabineti Ekologiya və Təbii Sərvətlər, İqtisadi İnkişaf, Ədliyyə Nazirliklərinin və Dövlət Gömrük Komitəsinin razılaşdırılmış təklifləri əsasında qərar qəbul edib.