Azərbaycan, Qazax, 19 fevral / Trend müxbir N.Fətullayeva/ Azərbaycanın Ağstafa rayonunda (şimal-qərb) yeni tikiş fabriki inşa ediləcək, - Ağstafa rayon İcra hakimiyyəti başçısının birinci müavini Ramiz Tatarov məlumat verib.
1000 nəfərin işlə təmin olunacağı fabrikin tikintisinə gələn aydan başlanılacaq və bunun üçün şəhər İcra Hakimiyyətinin büdcəsindən səkkiz milyon manat vəsait ayrılıb, - o deyib.
"Fabrikdə üst geyimlərinin istehsalı nəzərdə tutulub. İlkin olaraq kişi və qadın kostumlarının buraxılacağı gözlənilir".
Tatarov deyib ki, müəssisə avqust ayınadək istismara veriləcək və bununla da rayonda işsizlik qismən azaldılacaq.
Ağstafada 345 nəfər işsiz qeydiyyatdadır. Ötən il ərzində müraciət etmiş 282 nəfər işsizin 178-i işlə təmin olunub, 12 nəfər peşə hazırlığına göndərilib. Rayon Məşğulluq Mərkəzinin rəhbəri Əli Əliyev son iki il ərzində rayonda istifadəyə verilmiş müəssisələrin açılması ilə iş axtaranların sayının 800 nəfər azaldığını bildirib.
